កូរ៉េខាងត្បូង៖ នេះបើយោងតាមមន្ត្រី សុខាភិបាលកាលពីថ្ងៃសុក្រ បានប្រាប់ឲ្យដឹងថា សារព្រមានអំពីហានិភ័យ នៃការបើកបរក្រោមឥទ្ធិពលនៃគ្រឿងស្រវឹង នឹងត្រូវបានបង្ហាញនៅលើវេចខ្ចប់ភេសជ្ជៈ មានជាតិអាល់កុលនៅទូទាំងប្រទេសកូរ៉េខាងត្បូង នេះយោងតាមការចេញផ្សាយពីគេហទំព័រ Korea Times ។
បន្ទាប់ពីការអនុម័តសេចក្តី ព្រាងច្បាប់ដោយរដ្ឋសភាកាលពីថ្ងៃមុន ច្បាប់ស្តីពីការលើកកម្ពស់សុខភាពជាតិ ដែលបានកែសម្រួលនឹងតម្រូវ ឲ្យអ្នកលក់បញ្ចូលសារព្រមាន អំពីការបើកបរក្នុងស្ថានភាពស្រវឹង អាចមានក្រាហ្វិកពណ៌នា អំពីគ្រោះថ្នាក់របស់វានៅលើ ស្លាកផលិតផលគ្រឿងស្រវឹងរបស់ពួកគេ។
រីឯចំណុចដែលបានកែប្រែនៃច្បាប់នេះ នឹងចូលជាធរមានមួយឆ្នាំ បន្ទាប់ពីការប្រកាសរបស់ខ្លួន។ បច្ចុប្បន្ននេះ ស្លាកសញ្ញាជាតិអាល់កុល បង្ហាញតែការព្រមានសុខភាព ក៏ដូចជាសារជាក់លាក់ អំពីគ្រោះថ្នាក់ដែលវាបង្កឡើង ជាពិសេសប្រឆាំងនឹងសុខភាពមាតា និងទារក។
សមាជិកសភាដែលបាន ស្នើច្បាប់នេះបាននិយាយថា ពួកគេបានបង្កើតគំនិតដើម្បីបង្កើនការ យល់ដឹងអំពីហានិភ័យនៃការបើកបរ ក្នុងស្ថានភាពស្រវឹង និងកាត់បន្ថយការចំណាយសង្គមនៃផលវិបាករបស់វា។
យោងតាមទិន្នន័យបានចេញផ្សាយ កាលពីឆ្នាំមុនដោយអាជ្ញាធរចរាចរណ៍ផ្លូវគោក កូរ៉េដែលផ្តល់មូលនិធិដោយរដ្ឋថា មនុស្សចំនួន ១,១៦៧ នាក់បានស្លាប់ និងចំនួន ១២២,៥៦៦ នាក់ផ្សេងទៀតបានរងរបួស ដោយសារតែឧប្បត្តិហេតុបើកបរក្នុងស្ថានភាព ស្រវឹងដែលបានកើតឡើងរវាងឆ្នាំ ២០១៩ និង២០២៣៕
