អឺរ៉ុប វាយបកទៅលើការ កត់សម្គាល់ពាណិជ្ជកម្ម របស់លោក ត្រាំ ដោយលើកឡើង ពីប្រាក់ចំណេញ របស់អាមេរិក នៅក្នុងទ្វីបអឺរ៉ុប

ព្រុចសែល ៖ សហភាពអឺរ៉ុប បានប្រឆាំងនឹងការអះអាង របស់ប្រធានាធិបតីអាមេរិក លោក ដូណាល់ ត្រាំ ដែលថាប្លុកនេះបានទាញ យកផលប្រយោជន៍ ពីសហរដ្ឋអាមេរិក ដោយលើកហេតុផលថា អាជីវកម្មអាមេរិក បានប្រមូលផលចំណេញ យ៉ាងច្រើនពីការវិនិយោគនៅអឺរ៉ុប។

នៅពេលសួរនៅក្នុងសន្និសីទ សារព័ត៌មានអំពីការកត់សម្គាល់ របស់លោក ត្រាំ ថា “សហភាពអឺរ៉ុប ត្រូវបានបង្កើតឡើងក្នុងគោលបំណង ដើម្បីបំបាក់សហរដ្ឋអាមេរិក” អ្នកនាំពាក្យគណៈកម្មាធិការអឺរ៉ុបលោក Olof Gill បានឲ្យដឹងថា ចាប់តាំងពីការបង្កើតរបស់ខ្លួនមក អឺរ៉ុប គឺជាផលប្រយោជន៍ សម្រាប់សហរដ្ឋអាមេរិក ។

លោក Gill បានលើកឡើងថា “តាមរយៈការបង្កើតទីផ្សារតែមួយដ៏ធំ និងរួមបញ្ចូលគ្នា សហភាពអឺរ៉ុប បានសម្របសម្រួលពាណិជ្ជកម្ម កាត់បន្ថយការចំណាយ សម្រាប់អ្នកនាំចេញអឺរ៉ុប និងស្តង់ដារ និង បទប្បញ្ញត្តិដែលចុះសម្រុងគ្នានៅទូទាំងរដ្ឋ ជាសមាជិករបស់យើង។ ជាលទ្ធផល ការវិនិយោគរបស់សហរដ្ឋអាមេរិក នៅអឺរ៉ុបទទួលបានផល ចំណេញខ្ពស់” ។

លោកបានគូសបញ្ជាក់ថា ពាណិជ្ជកម្មប្រចាំឆ្នាំ រវាងសហរដ្ឋអាមេរិក និងសហភាពអឺរ៉ុប មានលើសពី ១,៥ពាន់ពាន់លានអឺរ៉ូ (១,៥៦ពាន់ពាន់ ដុល្លារអាមេរិក) ដែលធ្វើឱ្យវាក្លាយជាទំនាក់ទំនង ពាណិជ្ជកម្មទ្វេភាគី និងការវិនិយោគដ៏ធំបំផុតមួយ របស់ពិភពលោក។

លោកបានបន្ដថា “សហភាពអឺរ៉ុប ជឿជាក់ថាយើង គួរតែធ្វើការរួមគ្នា ដើម្បីរក្សាឱកាសទាំងនេះសម្រាប់ប្រជាជន និងអាជីវកម្មរបស់យើង នៅលើភាគីទាំងសងខាង នៃមហាសមុទ្រអាត្លង់ទិក ជំនួសឱ្យការធ្វើការប្រឆាំងនឹងគ្នាទៅវិញទៅមក។ យើងឈរសម្រាប់ការសន្ទនា ការបើកចំហ និងទៅវិញទៅមក” ៕
ប្រែសម្រួល ឈូក បូរ៉ា