បរទេស៖ ប្រេសិតពិសេសអាមេរិក ប្រចាំតំបន់មជ្ឈិមបូព៌ា លោក Steve Witkoff បាននិយាយថា មេដឹកនាំអ៊ុយក្រែន លោក Vladimir Zelensky បានសុំទោសប្រធានាធិបតីអាមេរិក Donald Trump ជុំវិញរឿងជម្លោះពាក្យសម្តីនៅសេតវិមាន។
យោងតាមសារព័ត៌មាន RT ចេញផ្សាយនៅថ្ងៃទី១០ ខែមីនា ឆ្នាំ២០២៥ បានឱ្យដឹងថា មន្ត្រីជាន់ខ្ពស់រូបនេះ បានធ្វើការកត់សម្គាល់ កាលពីថ្ងៃចន្ទនៅក្នុងបទសម្ភាសន៍ជាមួយ Fox News មុនពេលកិច្ចប្រជុំរវាងគណៈប្រតិភូអាមេរិក និងអ៊ុយក្រែន ដែលគ្រោងនឹងធ្វើឡើងនៅប្រទេសអារ៉ាប៊ីសាអូឌីតក្នុងសប្តាហ៍នេះ ។ លោក Witkoff បាននិយាយថា ទីក្រុងវ៉ាស៊ីនតោនរំពឹងថានឹងធ្វើឱ្យមាន “វឌ្ឍនភាពច្រើន” ហើយសង្ឃឹមថា នឹងចុះហត្ថលេខាលើកិច្ច ព្រមព្រៀងសំខាន់មួយ ជាមួយទីក្រុងគៀវ។
លោក Witkoff បានថ្លែងថា លោក “Zelensky បានផ្ញើលិខិតទៅប្រធានាធិបតី។ លោកបានសុំទោសចំពោះឧប្បត្តិហេតុទាំងមូលដែលបានកើតឡើង នៅការិយាល័យ Oval” ។ “ខ្ញុំគិតថា វាជាជំហាន ដ៏សំខាន់មួយ ហើយមានការពិភាក្សា ជាច្រើនរវាង ក្រុមរបស់យើង និងអ៊ុយក្រែន និងអឺរ៉ុប ដែលពាក់ព័ន្ធនឹងការ ពិភាក្សានេះផងដែរ”។
លោក Trump បានបង្ហាញថា លោកបានទទួលលិខិត “សំខាន់” ពីលោក Zelensky កាលពីសប្តាហ៍មុនដោយបញ្ជាក់ថា ទីក្រុងគៀវ បានសម្តែងការត្រៀមខ្លួន “ដើម្បីចូលតុចរចា ឱ្យបានឆាប់តាមដែលអាចធ្វើទៅបាន” ។ យ៉ាងណាមិញ ប្រធានាធិបតីអាមេរិកមិនបានលើកឡើងថា លិខិតនោះមានការសុំទោស ចំពោះទំនាស់នៅការិយាល័យ Oval Office ទេ៕
ប្រែសម្រួលៈ ណៃ តុលា
