ហ៊ីរ៉ូស៊ីម៉ា៖ យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា ចំនួនអ្នកទស្សនាសារមន្ទីរសន្តិភាព Hiroshima ចងក្រងឯកសារពីការបំផ្លិចបំផ្លាញ ដែលបណ្តាលមកពីការទម្លាក់គ្រាប់បែក បរមាណូរបស់អាមេរិកលើទីក្រុងកាលឆ្នាំ ១៩៤៥ បានកើនឡើងលើសពី ៨០ លាននាក់កាលពីថ្ងៃអាទិត្យ ក្នុងរយៈពេល ៧០ ឆ្នាំ បន្ទាប់ពីការបើកដំណើរការនៅឆ្នាំ ១៩៥៥។
ក្នុងពិធីរំលឹកសមិទ្ធិផលនេះ លោក Yoshifumi Ishida នាយកសារមន្ទីរបាននិយាយថា ខ្ញុំសង្ឃឹមថាប្រជាជនទាំងពីប្រទេសជប៉ុន និងក្រៅប្រទេស ក៏ដូចជាអ្នកដែលនឹងដឹកនាំ មនុស្សជំនាន់ក្រោយនឹងបន្តទស្សនា និងទទួលស្គាល់ថាអាវុធនុយក្លេអ៊ែរ គឺជាអំពើអាក្រក់ទាំងស្រុង។
អ្នកទស្សនាទី ៨០ លាននាក់គឺនាង Rinon Shimura បុគ្គលិកហាងកាហ្វេអាយុ ២៣ ឆ្នាំមកពីទីក្រុងតូក្យូ។ នាងបាននិយាយថា នាងបានឮរឿងរ៉ាវពីអ្នករួចជីវិត ពីគ្រាប់បែកបរមាណូកាលនាង នៅជាសិស្សវិទ្យាល័យ ដោយបានបំផុសគំនិតនាង ឲ្យទៅទស្សនាសារមន្ទីរ។
ការទៅទស្សនាទីក្រុងហ៊ីរ៉ូស៊ីម៉ា ជាលើកដំបូងជាមួយគ្រួសាររបស់នាង Shimura បាននិយាយថា ខ្ញុំចង់សិក្សាពីទំហំនៃការខូចខាតក្នុងទីក្រុង Hiroshima និងពីអ្វីដែលបានប៉ះពាល់នឹង គ្រាប់បែកបរមាណូកាលពីពេលនោះ។ ខ្ញុំនឹងចែករម្លែកវាជាមួយអ្នកទាំងអស់គ្នា។
មេដឹកនាំនៃប្រទេសទាំង ៧ បានទៅទស្សនាសារមន្ទីរក្នុងអំឡុងពេល កិច្ចប្រជុំកំពូលរបស់ពួកគេនៅទីក្រុងហ៊ីរ៉ូស៊ីម៉ាក្នុងឆ្នាំ ២០២៣ ។ កាលខែកុម្ភៈ វាបានស្វាគមន៍ភ្ញៀវទេសចរចំនួន ២ លាននាក់ក្នុងឆ្នាំសារពើពន្ធបច្ចុប្បន្នរហូតដល់ថ្ងៃទី ៣១ ខែមីនា ដែលជាកំណត់ត្រាខ្ពស់ ចាប់តាំងពីវាបានបើកដំណើរការ។
សារមន្ទីរនេះមានទីតាំងនៅជិតដីសូន្យ នៃការផ្ទុះអាតូមិចក្នុងទីប្រជុំជនហ៊ីរ៉ូស៊ីម៉ា សារមន្ទីរបង្ហាញវត្ថុបុរាណរបស់ជនរងគ្រោះ រួមជាមួយនឹងសម្ភារៈផ្សេងទៀត ដើម្បីបង្ហាញពីភាពរន្ធត់នៃអាវុធនុយក្លេអ៊ែរ។
អាមេរិកបានទម្លាក់គ្រាប់បែក បរមាណូលើទីក្រុងហ៊ីរ៉ូស៊ីម៉ា និងណាហ្គាសាគីក្នុងខែសីហា ឆ្នាំ ១៩៤៥ ក្នុងថ្ងៃចុងក្រោយនៃសង្គ្រាមលោកលើកទី ២ ដោយបានសម្លាប់មនុស្សប្រហែល ២១៤ ,០០០ នាក់នៅចុងឆ្នាំនោះ ហើយទុកឲ្យអ្នករស់រានមានជីវិតជាច្រើនប្រឈម នឹងបញ្ហាសុខភាពផ្លូវកាយ និងផ្លូវចិត្តរយៈពេលវែង៕
