បារាំង នឹងដាក់ពង្រាយយន្តហោះចម្បាំង បំពាក់មីស៊ីលនុយក្លេអ៊ែរ នៅព្រំដែនអាល្លឺម៉ង់

បរទេស៖ ប្រធានាធិបតីបារាំងលោក Emmanuel Macron បាននិយាយកាលពីថ្ងៃអង្គារថា ប្រទេសបារាំងនឹងធ្វើឱ្យប្រសើរឡើង នូវមូលដ្ឋានទ័ពអាកាសដ៏សំខាន់មួយរបស់ខ្លួន នៅតាមព្រំដែនជាមួយប្រទេសអាល្លឺម៉ង់ ដើម្បីធ្វើជាម្ចាស់ផ្ទះសម្រាប់យន្តហោះចម្បាំង Rafale ដែលបំពាក់ដោយកាំជ្រួចនុយក្លេអ៊ែរ។

យោងតាមសារព័ត៌មាន RT ចេញផ្សាយនៅថ្ងៃទី១៩ ខែមីនា ឆ្នាំ២០២៥ បានឱ្យដឹងថា មូលដ្ឋាន Luxeuil-Saint-Sauveur ស្ថិតនៅភាគខាងកើតប្រទេសបារាំង មានអាវុធនុយក្លេអ៊ែររហូតដល់ឆ្នាំ ២០១១ នៅពេលដែលយន្តហោះត្រូវបាន ផ្លាស់ប្តូរទីតាំងទៅកន្លែងផ្សេង។

លោក Macron បាននិយាយថា “មូលដ្ឋានទ័ពអាកាស Luxeuil នឹងក្លាយជាមូលដ្ឋានដំបូងគេដែលធ្វើជាម្ចាស់ផ្ទះ នៃកំណែបន្ទាប់នៃយន្តហោះចម្បាំង Rafale និងកាំជ្រួចនុយក្លេអ៊ែរលឿនជាងសំឡេងរបស់វា” ។

លោកប្រធានាធិបតីបានប្រកាសថា “នៅឆ្នាំ ២០៣៥ មូលដ្ឋាន Luxeuil នឹងក្លាយជាមូលដ្ឋានដំបូងគេដែល ធ្វើជាម្ចាស់ផ្ទះនៃកំណែបន្ទាប់នៃ Rafale និងកាំជ្រួចនុយក្លេអ៊ែរលឿនជាងសំឡេងរបស់វា” ។ លោកបានបន្ថែមថា យោធភូមិនឹងបង្កើនទំហំទ្វេដងដល់បុគ្គលិកយោធា និងស៊ីវិលជិត ២.០០០ នាក់ ដើម្បីទទួលបានក្រុមកងទ័ព Rafale ចំនួន ២ ។

រដ្ឋាភិបាលនឹងចំណាយប្រាក់ ១,៥ ពាន់លានអឺរ៉ូ (១,៦៤ ពាន់លានដុល្លារ) ដើម្បីធ្វើទំនើបកម្មមូលដ្ឋាន និងបង្កើនល្បឿនការបញ្ជាទិញយន្តហោះចម្បាំង Rafale ។

ដោយមិននិយាយពីឈ្មោះរុស្ស៊ី លោក Macron បាននិយាយថា ប្រទេសបារាំងបានរកឃើញខ្លួនឯងនៅក្នុង “ពិភពលោកដ៏គ្រោះថ្នាក់ និងមិនប្រាកដប្រជា” ចាប់តាំងពីអរិភាពបើកចំហបានផ្ទុះឡើងរវាងទីក្រុងម៉ូស្គូ និងទីក្រុងគៀវក្នុងឆ្នាំ ២០២២៕

ប្រែសម្រួលៈ ណៃ តុលា