តូក្យូ៖ អតីតនាយករដ្ឋមន្ត្រីអីស្រ្តាលី លោក Scott Morrison ដែលបានចរចារកិច្ចព្រមព្រៀង ទិញយកបច្ចេកវិទ្យា ជាមួយសហរដ្ឋអាមេរិក និងអង់គ្លេសបានឲ្យដឹងថា នាវាមុជទឹកដើរដោយ ថាមពលនុយក្លេអ៊ែរ នាពេលអនាគតរបស់អូស្ត្រាលី អាចធ្វើប្រតិបត្តិការនៅជិតកោះតៃវ៉ាន់ និងក្រុមកោះដែលគ្រប់គ្រងដោយប្រទេសជប៉ុន និងដើរតួជាការរារាំងដល់ប្រទេសចិន នៅក្នុងតំបន់។
ខណៈពេលដែលទទួលស្គាល់ថា ការបញ្ជូននាវាមុជទឹក ទៅកាន់ទីតាំងជាក់លាក់ទាំងនោះ មិនមែនជាហេតុផល នៅពីក្រោយការជំរុញរបស់អូស្ត្រាលី សម្រាប់នាវាមុជទឹកដើរ ដោយថាមពលនុយក្លេអ៊ែរនោះទេ លោក Morrison បានឲ្យដឹងនៅក្នុងបទសម្ភាសន៍មួយនៅទីក្រុងស៊ីដនី កាលពីថ្ងៃព្រហស្បតិ៍ថា ច្រកសមុទ្រតៃវ៉ាន់ និងប្រជុំកោះសេនកាគូ ក្នុងសមុទ្រចិនខាងកើត “បង្ហាញពីចំណុចសក្ដានុពល និងជម្លោះដែលអាចទាក់ទាញ អូស្ត្រាលីយ៉ាងខ្លាំង” ដោយសារផលប្រយោជន៍ផ្ទាល់ខ្លួន។
អតីតនាយករដ្ឋមន្ត្រីអូស្ត្រាលី ដែលរួមជាមួយមេដឹកនាំអាមេរិក និងអង់គ្លេស បានប្រកាសពីការចាប់ផ្តើមភាពជាដៃគូសន្តិសុខ AUKUS នៅឆ្នាំ២០២១ថា “ចំណុចអំពីនាវាមុជទឹកដើរដោយថាមពលនុយក្លេអ៊ែរគឺពួកគេអាចទៅគ្រប់ទីកន្លែង ហើយពួកគេអាចទៅគ្រប់ទីកន្លែងដែលអ្នកត្រូវការឱ្យពួកគេទៅ ហើយដើម្បីធ្វើដូច្នេះដោយសម្ងាត់” ។
លោកបានលើកឡើងថា “យើងបានស្វែងរកសមត្ថភាព ដែលអាចឲ្យយើងទៅគ្រប់ទីកន្លែង ដែលនឹងរួមបញ្ចូលកន្លែង ទាំងនោះបើចាំបាច់” ។ ក្រោមភាពជាដៃគូបីផ្លូវ អូស្ត្រាលី គ្រោងនឹងទិញនាវាមុជទឹកដើរដោយ ថាមពលនុយក្លេអ៊ែរពី សហរដ្ឋអាមេរិកដោយចាប់ផ្តើមនៅដើមទសវត្សរ៍ឆ្នាំ២០៣០ និងចែកចាយនាវាដែលផលិត ក្នុងស្រុកជាលើកដំបូងរបស់ខ្លួន នៅដើមទសវត្សរ៍ឆ្នាំ២០៤០។ ការទិញយកនេះគឺជាផ្នែកមួយ នៃកិច្ចខិតខំប្រឹងប្រែងរបស់ប្រទេសទាំងបី ដើម្បីប្រឆាំងនឹងការពង្រីកដែនសមុទ្ររបស់ចិន និងមហិច្ឆតាទឹកដីនៅក្នុងតំបន់ឥណ្ឌូប៉ាស៊ីហ្វិក។
ចំណាត់ការនេះកើតឡើងចំពេលមានសម្ពាធកាន់តែខ្លាំងឡើងពីប្រទេសចិនលើកោះតៃវ៉ាន់ ដែលជាកោះប្រជាធិបតេយ្យគ្រប់គ្រងដោយខ្លួនឯង ដែលទីក្រុងប៉េកាំងចាត់ទុកថាជាទឹកដីរបស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
តៃវ៉ាន់ ត្រូវបានគេមើលឃើញថា ជាចំណុចសំខាន់ខាងយោធា ដែលអាចទាក់ទាញសហរដ្ឋអាមេរិកឱ្យមានជម្លោះជាមួយចិន ដែលជាហេតុនាំ ឱ្យមានការប្រឈមផ្នែកសន្តិសុខយ៉ាងធ្ងន់ធ្ងរ សម្រាប់ប្រទេសជប៉ុន ដោយសារភាពជិត នៃប្រជុំកោះឆ្ងាយៗរបស់ខ្លួន រួមទាំងសេនកាគុស ដែលគ្មានមនុស្សរស់នៅ ដែលទីក្រុងប៉េកាំងទាមទារ និងហៅថា Diaoyu ។
លោក Morrison បានបន្ថែមថា ប្រទេសជប៉ុន ដែលជាសម្ព័ន្ធមិត្តសន្តិសុខដ៏សំខាន់ របស់សហរដ្ឋអាមេរិក ក៏នឹងទទួលបានអត្ថប្រយោជន៍ពីភាព ជាដៃគូរបស់ AUKUS ផងដែរ ដោយលោក Morrison បានបញ្ជាក់ថា នឹងមាន “នាវាមុជទឹកដើរដោយថាមពល នុយក្លេអែរបន្ថែមទៀត សម្រាប់ដាក់ពង្រាយ ជាពិសេសនៅក្នុងតំបន់ឥណ្ឌូប៉ាស៊ីហ្វិក”៕
ប្រែសម្រួល ឈូក បូរ៉ា
