ចិន៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ស្ត្រីវ័យក្មេងម្នាក់នៅប្រទេសចិន កំពុងបង់ថ្លៃជួលបន្ទប់ទឹកការិយាល័យ តម្លៃថោកបំផុត ៥០ យន់ស្មើនឹង៧ដុល្លារក្នុងមួយខែ ខណៈនាងពិបាករកលុយជួលដើម្បីជួយ ដល់ការសិក្សារបស់ប្អូនប្រុសរបស់នាង។
ស្ត្រីនោះឈ្មោះ Yang អាយុ ១៨ឆ្នាំ មកពីខេត្ត Hubei ភាគខាងត្បូងប្រទេសចិន។ នាងធ្វើការផ្នែកលក់នៅហាងលក់គ្រឿងសង្ហារិមនៅទីក្រុង Zhuzhou ខេត្ត Hunan ដោយទទួលបានប្រាក់ខែប្រចាំខែចំនួន ២,៧០០ យន់ស្មើនឹង៣៧០ បើធៀបនឹងប្រាក់ខែជាមធ្យមរបស់ទីក្រុង គឺ ៧,៥០០យន់។
នេះបើយោងតាមសារព័ត៌មាន South China Morning Post ថា ជាមួយនឹងតម្លៃជួលក្នុងតំបន់ចាប់ពី ៨០០ ទៅ ១,៨០០យន់ នាង Yang មិនអាចជួលកន្លែងរស់នៅបានទេ។ ជាលទ្ធផល នាងបានរៀបចំជាមួយនិយោជករបស់ នាងឲ្យស្នាក់នៅក្នុងបន្ទប់ទឹកការិយាល័យ ដែលមានទំហំ ៦ ម៉ែត្រការ៉េ និងមានបង្គន់អនាម័យចំនួន២ និងអាងលិចមួយ។ នាង Yang បានរៀបចំគ្រែបត់ ចង្ក្រានដាំបាយ វាំងនន និងទូខោអាវ ដើម្បីធ្វើឲ្យលំហរអាចរស់នៅបាន ។
នាង Yang បានស្នាក់នៅទីនោះអស់មួយខែហើយ ដោយពេលល្ងាចធ្វើគុយទាវម្តងម្កាល។ អ្នករួមការងាររបស់នាងប្រើបង្គន់ជាធម្មតានៅពេលថ្ងៃ។
ប្រធានរបស់នាងបានបង្ហើបថា នាង Yang បានពិចារណាជម្រើសផ្សេងទៀត ដូចជាការរស់នៅក្នុងការិយាល័យដែលមិនប្រើប្រាស់ ឬជួលបន្ទប់ក្នុងតម្លៃ ៤០០ យន់ក្នុងមួយខែ។ ប៉ុន្តែបានជ្រើសរើសបង្គន់របស់ក្រុមហ៊ុន ព្រោះវាមានសុវត្ថិភាពជាង ដោយផ្តល់ប្រព័ន្ធឃ្លាំមើល ២៤ ម៉ោងរបស់ក្រុមហ៊ុន និងនៅជិតកន្លែងធ្វើការរបស់នាង។
នេះបើតាម Sina បាននិយាយថា ប្រធានគ្រោងនឹងផ្លាស់ នាង Yang ទៅបន្ទប់ការិយាល័យដែលទើបកែលម្អថ្មី ។
នាង Yang បានចែករម្លែកស្ថានភាពរស់នៅរបស់នាងនៅលើ Douyin ជាកំណែ TikTok របស់ចិន ហើយទទួលបានអ្នកតាមដានរាប់ម៉ឺននាក់យ៉ាងឆាប់រហ័ស។ ខណៈអ្នកខ្លះចោទសួរថាតើស្ថានភាព របស់នាងត្រូវបានគេរៀបចំឬអត់នោះ Yang បានទទូចថា វាគ្រាន់តែដើម្បីភាពងាយស្រួល។
នាង Yang បាននិយាយថា នាងធំឡើងជាមួយជីតារបស់នាង បន្ទាប់ពីឪពុកម្តាយរបស់នាងបានចាកចេញ ទៅធ្វើការនៅពេលនាងមានអាយុត្រឹមតែ ១ ឆ្នាំប៉ុណ្ណោះ។កាលអាយុ ១៦ ឆ្នាំ នាង Yang បានចាកចេញពីផ្ទះដើម្បីចិញ្ចឹមខ្លួនឯង។ ឪពុកម្តាយរបស់នាងតែងតែសុំឲ្យនាង ផ្ញើប្រាក់ដើម្បីផ្គត់ផ្គង់ការសិក្សា របស់ប្អូនប្រុសរបស់នាងដែលមានអាយុ ១០ ឆ្នាំរបស់នាង។
ខណៈអ្នកនិយមលេងអ៊ីនធើណេត មួយចំនួនសរសើរការតស៊ូរបស់នាង អ្នកខ្លះទៀតសម្តែងការព្រួយបារម្ភអំពីស្ថានភាពរស់នៅរបស់នាង ដោយព្រមានថា សំណើមក្នុងបង្គន់អាចប៉ះពាល់ ដល់សុខភាពរបស់នាង ខណៈដែលអាកាសធាតុក្តៅ។ អ្នកនិយមលេងអ៊ីនធើណេតម្នាក់ក៏បាន ជូនពរឲ្យគ្រួសារទាំងអស់ប្រព្រឹត្តចំពោះ កូនប្រុសស្រីរបស់ពួកគេដោយស្មើភាពគ្នា៕
