ចិន ៖ យោងតាមការចេញផ្សាយ ពីគេហទំព័រ VN Express បានប្រាប់ឲ្យដឹងថា រាជនីសម្រស់នាង Li Si Xuan ជាម្ចាស់គ្រងដំណែង នៃកម្មវិធីប្រកួតសម្រស់របស់ចិន ត្រូវបានកាត់ទោសឲ្យជាប់ពន្ធនាគារ ពីបទក្លែងបន្លំសញ្ញាបត្រសាកលវិទ្យាល័យ Columbia ដើម្បីទទួលបានការចូលរៀន នៅសាកលវិទ្យាល័យហុងកុង (HKU) ។
យោងតាម 8days បាននិយាយថា នាង Li ត្រូវបានកាត់ទោសឲ្យជាប់គុក ២៤០ ថ្ងៃ កាត់បន្ថយពីអាណត្តិ ៣០០ ថ្ងៃ ដោយ ៤០ ថ្ងៃត្រូវបាន កាត់ទោសដាច់ដោយ ឡែកពីទោស ២០០ ថ្ងៃ។ តុលាការបានកំណត់ថា សកម្មភាពរបស់នាងមិនប៉ះពាល់ ដល់ការទទួលយកបេក្ខជន ផ្សេងទៀតទេ ហើយមេធាវីការពារក្តីរបស់នាងបានអង្វរសុំការបន្ធូរបន្ថយ ដោយលើកឡើងពីវិប្បដិសារីរបស់នាង និងកង្វះភស្តុតាងបង្ហាញថា ឯកសារក្លែងបន្លំត្រូវ បានប្រើប្រាស់ដើម្បីផលប្រយោជន៍ ហិរញ្ញវត្ថុផ្ទាល់ខ្លួន។
នៅឆ្នាំ ២០២១ នាង Li បានដាក់ពាក្យទៅ HKU ដោយអះអាងថា នាងបានបញ្ចប់ការសិក្សាថ្នាក់បរិញ្ញាបត្រផ្នែកភាសាវិទ្យានៅសាកលវិទ្យាល័យ Columbia ក្នុងទីក្រុងញូវយ៉ក។ នាងបានបញ្ជូនឯកសារក្លែងបន្លំ រួមទាំងវិញ្ញាបនបត្រដែលប្រឌិតឡើង ដើម្បីគាំទ្រការដាក់ពាក្យរបស់នាង ហើយក្រោយមកត្រូវបានអនុញ្ញាតឲ្យចូលរៀនកម្មវិធី Master’s Master’s in Applied Linguistics របស់ HKU ។
ទោះជាយ៉ាងណាក៏ ដោយ នៅឆ្នាំ ២០២៤ HKU បានចាប់ផ្តើមការស៊ើប អង្កេតមួយ បន្ទាប់ពីទទួលបានរបាយការណ៍ អំពីសិស្សមួយចំនួន ដែលមានសក្តានុពល ប្រើប្រាស់ឯកសារក្លែងបន្លំ ។ នៅពេលទាក់ទងទៅសាកលវិទ្យាល័យ Columbia វាត្រូវបានបញ្ជាក់ថា នាង Li មិនដែលចូលរៀន នៅស្ថាប័ននេះទេ ។
បន្ថែមពីលើការក្លែងបន្លំលិខិតសម្គាល់ថ្នាក់បរិញ្ញាបត្ររបស់នាង នាង Li ក៏ត្រូវបានគេរកឃើញថា បានផ្លាស់ប្តូរវិញ្ញាបនបត្រថ្នាក់អនុបណ្ឌិតរបស់នាង ។ នាងបានកែសម្រួលកាលបរិច្ឆេទនៃពិធីបញ្ចប់ការសិក្សារបស់នាងដោយអះអាងថា វាបានកើតឡើងនៅថ្ងៃទី ១២ ខែមិថុនា ទោះបីជាវាកើតឡើងនៅថ្ងៃទី ១១ ខែមិថុនាក៏ដោយ។
បន្ទាប់ពីខកខានមិនបានជួបនាង Li សាកលវិទ្យាល័យហុងកុង HKU បានបញ្ឈប់ការចុះឈ្មោះរបស់នាង ហើយរាយការណ៍រឿងនេះទៅអាជ្ញាធរ ហើយនាង Li ត្រូវបានចាប់ខ្លួនភ្លាមៗ។
នាង Li បានសារភាពថា នាងបានបញ្ចប់ការសិក្សាពីសាកលវិទ្យាល័យ Zhongnan University of Economics and Law ក្នុងទីក្រុង Wuhan កាលឆ្នាំ ២០២០ ។ នាងក៏បានទទួលស្គាល់ថាបានជួលភ្នាក់ងារមួយឈ្មោះថា Academic Emperor ដើម្បីជួយនាងក្នុងការចូលរៀននៅ HKU និងធានានូវលិខិតបញ្ជាក់ការសិក្សាក្លែងក្លាយ។
នាង Li បានចំណាយប្រាក់សរុបចំនួន ៣៨០,000 យន់ (ប្រហែល ៥២,៣៧១ ដុល្លារអាមេរិក) សម្រាប់សេវាកម្មរបស់ទីភ្នាក់ងារនេះ រួមបញ្ចូលទាំងការចូលរួមក្នុងវគ្គសិក្សាតាមអ៊ីនធើណេត ត្រូវបានចោទប្រកាន់ថារៀបចំដោយសាកលវិទ្យាល័យ Columbia ៕
