អាមេរិក៖ នេះបើយោងតាមការសិក្សាដ៏សំខាន់មួយបានប្រាប់ឲ្យដឹងថា ថ្នាំ Ozempic និងថ្នាំសម្រកទម្ងន់ស្រដៀងគ្នាអាចបង្កើនហានិភ័យនៃជំងឺមហារីកតម្រងនោម ទោះជាយ៉ាងណាក៏ដោយ ថ្នាំនេះត្រូវបានគេរាយការណ៍ថា បន្ថយហានិភ័យនៃជំងឺមហារីកច្រើនជាងរាប់សិបផ្សេងទៀត បង្ហាញពីអត្ថប្រយោជន៍រួមរបស់ពួកគេនៅតែអាចលើសពីគ្រោះថ្នាក់។
នេះបើតាមកាសែត Daily Mail បានសរសេរកាលពីថ្ងៃអង្គារថា ការសិក្សាថ្មីមួយបានបង្ហាញក្នុងសន្និសីទប្រចាំឆ្នាំរបស់ American Society of Clinical Oncology កាលខែឧសភា បានរកឃើញថា អ្នកដែលប្រើប្រាស់ថ្នាំសម្រកទម្ងន់ដ៏ពេញនិយមដូចជា Ozempic អាចមានហានិភ័យខ្ពស់ក្នុងការវិវត្តទៅជាជំងឺមហារីកតម្រងនោម។
អ្នកស្រាវជ្រាវបានពិនិត្យមើលកំណត់ត្រាវេជ្ជសាស្ត្រពីអ្នកជំងឺជាង ៨៦,០០០ នាក់នៅរដ្ឋផ្លរីដាក្នុងរយៈពេល១០ ឆ្នាំ។ ពួកគេបានរកឃើញ ៨៣ ករណីនៃជំងឺមហារីកតម្រងនោមក្នុងចំណោមអ្នកប្រើថ្នាំសម្រកទម្ងន់ ធៀបនឹង ៥៨ ករណីនៅក្នុងក្រុមស្រដៀងគ្នាដែលមិនប្រើថ្នាំ។
ការសិក្សាបានបង្ហាញពីឱកាសខ្ពស់ជាង ៣៣ ភាគរយក្នុងការកើតមហារីកតម្រងនោមសម្រាប់អ្នកប្រើថ្នាំទាំងនេះ។ ថ្នាំនេះគឺជាផ្នែកមួយនៃក្រុមដែលហៅថាថ្នាំ GLP-1 រួមមាន Wegovy និងអ្នកដទៃផងដែរ។ មហារីកតំរងនោម ត្រូវបានគេស្គាល់ថា ជាជំងឺស្ងាត់ ព្រោះវាច្រើនតែមិនបង្កឲ្យមានរោគសញ្ញាដំបូងឡើយ នៅពេលមានសញ្ញាដូចជា ឈាមក្នុងទឹកនោម ឈឺខ្នង ឬដុំពកលេចឡើង វាអាចរីករាលដាលរួចហើយ ដែលធ្វើឲ្យការរស់រានមានជីវិតតិចជាងមុន។
វេជ្ជបណ្ឌិត Hao Dai មកពីសាកលវិទ្យាល័យ Indiana ដឹកនាំការស្រាវជ្រាវបានប្រាប់កាសែត Daily Mail កាលពីថ្ងៃអង្គារថា លទ្ធផលមិនបង្ហាញថា ថ្នាំបង្កមហារីកតម្រងនោមនោះទេ ប៉ុន្តែលោកបានហៅការរកឃើញថា ពាក់ព័ន្ធ ហើយបាននិយាយថា ត្រូវការការត្រួតពិនិត្យបន្ថែមទៀត៕
