វ៉ាស៊ីនតោន៖ ប្រធានាធិបតីអាមេរិក លោក Donald Trump បានមានប្រសាសន៍កាលពីថ្ងៃពុធថា លោកគ្រោងនឹងដាក់ពន្ធ ១០០ ភាគរយលើឧបករណ៍អេឡិចត្រូនិកទំាងអស់ដែលនាំចូលមកកកាន់ទឹកដីអាមេរិក ខណៈក្រុមហ៊ុនបច្ចេកវិទ្យាយក្សអាមេរិក Apple គ្រោងវិនិយោគបន្ថែមចំនួន ១០០ ពាន់លានដុល្លារ នេះយោងតាមការចេញផ្សាយពីគេហទំព័រ China Daily។
លោកបានប្រាប់អ្នកយកព័ត៌មាននៅសេតវិមានថា យើងនឹងដាក់ពន្ធប្រហែល ១០០ ភាគរយលើបន្ទះសៀគ្វី និង ឧបករណ៍អេឡិចត្រូនិកទំាងអស។
រួមគ្នាជាមួយនាយកប្រតិបត្តិ Apple លោក Tim Cook លោកក៏បានប្រកាសថា Apple គ្រោងនឹងវិនិយោគបន្ថែមចំនួន ១០០ ពាន់លានដុល្លារនៅអាមេរិក។ សេចក្តីប្រកាសព័ត៌មាន Apple បាននិយាយថា ការប្តេជ្ញាចិត្តថ្មីគឺជាការបង្កើនល្បឿនដ៏សំខាន់នៃការវិនិយោគនៅអាមេរិករបស់ខ្លួន ឥឡូវនេះមានចំនួនសរុប ៦០០ ពាន់លានដុល្លារក្នុងរយៈពេល ៤ ឆ្នាំខាងមុខ។
ក្រុមហ៊ុនបច្ចេកវិទ្យាយក្សអាមេរិក Apple ក៏បានប្រកាសពីកម្មវិធីផលិតរបស់អាមេរិក ដែលតាមរយៈនោះ វានឹងបង្កើនការវិនិយោគរបស់ខ្លួននៅទូទាំងអាមេរិក និងលើកទឹកចិត្តដល់ក្រុមហ៊ុនទូទាំងពិភពលោកឲ្យផលិតសមាសធាតុសំខាន់ៗបន្ថែមទៀតនៅអាមេរិក។
ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃពុធថា នេះគឺជាការសន្យាចុងក្រោយបំផុតដែលធ្វើឡើងដោយក្រុមហ៊ុន Apple ក្នុងការនាំយកខ្សែសង្វាក់ផ្គត់ផ្គង់ និងការផលិតកម្រិតខ្ពស់របស់ខ្លួនត្រឡប់ទៅសហរដ្ឋអាមេរិកវិញ និងជៀសវាងការយកពន្ធលើទូរស័ព្ទ iPhone របស់ខ្លួន។
កាលពីខែឧសភា លោក Trump បានគំរាមកំហែងក្រុមហ៊ុន Apple និងក្រុមហ៊ុនផលិតទូរស័ព្ទផ្សេងទៀតជាមួយនឹងពន្ធ ២៥ ភាគរយលើផលិតផលដែលផលិតនៅក្រៅអាមេរិក៕
