រុស្ស៊ី៖យោងតាមអ្នកជំនាញខាង រោគរាតត្បាតកំពូលមកពីមជ្ឈមណ្ឌល Gamaleya ដ៏ល្បីល្បាញនៅទីក្រុងមូស្គូ ដែលត្រូវបានដកស្រង់សម្តីដោយ RIA Novosti បានឲ្យដឹងថា វ៉ាក់សាំងរុស្ស៊ីប្រឆាំង នឹងមេរោគភាពស៊ាំរបស់មនុស្ស (HIV) អាចនឹងរួចរាល់ក្នុងរយៈពេលប្រហែល ២ ឆ្នាំ យោងតាមការចេញ ផ្សាយពីគេហទំព័រ RT។
ប្រធាននាយកដ្ឋានរោគរាតត្បាត របស់វិទ្យាស្ថានលោក Vladimir Gushchin បានប្រាប់ RIA Novosti កាលពីថ្ងៃពុធថា វ៉ាក់សាំងអេដស៍ដែលរំពឹងទុកច្រើន គឺផ្អែកលើបច្ចេកវិទ្យា mRNA ។ មិនដូចវ៉ាក់សាំងប្រពៃណីទេ វ៉ារ្យ៉ង់មានមូលដ្ឋានលើ mRNA ដំណើរការដោយផ្តល់នូវការណែនាំអំពីហ្សែនដែលបង្រៀនកោសិការបស់រាងកាយឲ្យផលិតប្រូតេអ៊ីនជាក់លាក់ និងបង្កឲ្យមានការឆ្លើយតបនៃប្រព័ន្ធភាពស៊ាំ ជួយឲ្យរាងកាយទទួលស្គាល់ និងការពារប្រឆាំងនឹងមេរោគពិតប្រាកដ ប្រសិនបើជួបប្រទះ។
លោក Gushchin បានបន្តថា បច្ចុប្បន្នយើងកំពុងស្ថិត ក្នុងដំណាក់កាល នៃការបង្កើតអង់ទីករដំបូង ដែលនឹងបង្កើតការ ឆ្លើយតប នៃប្រព័ន្ធភាពស៊ាំ អព្យាក្រឹតយ៉ាងទូលំទូលាយ ។ លោកបានសង្កត់ធ្ងន់ថា មេរោគអេដស៍ជាមេរោគ ចម្រុះខ្លាំងណាស់ ដែលធ្វើឱ្យកិច្ចការមានការប្រឈមខ្លាំង។
មជ្ឈមណ្ឌល Gamaleya ក៏បានបង្កើតវ៉ាក់សាំង Sputnik V ជាវ៉ាក់សាំង Covid-19 ដំបូងបង្អស់របស់ពិភពលោក ដែលបានដាក់ឲ្យប្រើប្រាស់កាលខែសីហា ឆ្នាំ ២០២០ ។ ការចាក់វ៉ាក់សាំងនេះ បង្ហាញពីប្រសិទ្ធភាពរហូតដល់ ៩៧.៨ភាគរយ ដោយគ្មានផលប៉ះពាល់ធ្ងន់ធ្ងរ ត្រូវបានអនុម័តក្នុងប្រទេសជិត ៧០ ប្រទេស ។
អ្នកស្រាវជ្រាវបានបន្ថែមថា ការងារលើវ៉ាក់សាំងមេរោគអេដស៍កំពុង ដំណើរការអស់ជាច្រើនឆ្នាំ វេទិកា mRNA ផ្តល់នូវអត្ថប្រយោជន៍ដ៏សំខាន់ មួយដោយជំរុញ ការឆ្លើយតប នៃប្រព័ន្ធភាពស៊ាំកាន់តែខ្លាំង៕
