អាមេរិក ៖ យោងតាមការចេញផ្សាយពីគេហទំព័រ RTបានប្រាប់ឲ្យដឹងថា អាមេរិកនឹងអនុញ្ញាត ឲ្យមានការនាំចូលត្បូងពេជ្រ របស់ប្រទេសរុស្ស៊ីមួយចំនួនរហូតដល់ឆ្នាំ ២០២៦ ដោយបន្តការលើកលែង គួរឲ្យកត់សម្គាល់ ចំពោះការដាក់ទណ្ឌកម្មលើប្រទេសផលិតត្បូងថ្ម រដុបដ៏ធំបំផុតរបស់ពិភពលោក ។
ការហាមឃាត់ដោយផ្ទាល់លើត្បូងពេជ្រ ពីប្រទេស ដែលណែនាំដោយ G7 និង EU ជាផ្នែកនៃទណ្ឌកម្មទាក់ទងនឹង ជម្លោះអ៊ុយក្រែនបានចូលជាធរមាន កាលខែមករា ឆ្នាំ ២០២៤ ហើយត្រូវបានបន្តដោយការរឹតបន្តឹងលើថ្មដែលបានដំណើរការតាមរយៈប្រទេសទី ៣។ ក្រោយមក ទីក្រុងវ៉ាស៊ីនតោនបានបន្ធូរបន្ថយវិធានការនោះ ដោយមានការលើកលែងជាបណ្តោះអាសន្ន ធ្វើឲ្យមានការនាំចូលមានកម្រិតក្រោមលក្ខខណ្ឌមួយចំនួន។
យោងតាមអាជ្ញាប័ណ្ណរបស់ក្រសួងរតនាគារបានចេញក្នុងសប្តាហ៍នេះ ឲ្យដឹងថា ការលើកលែងនេះត្រូវបានអូសបន្លាយរហូតដល់ខែកញ្ញា ឆ្នាំ ២០២៦ ដោយគ្របដណ្តប់លើត្បូងពេជ្រមិនមែនឧស្សាហកម្មលើសពីមួយការ៉ាត់ដែលនៅខាងក្រៅប្រទេសរុស្ស៊ីចាប់តាំងពីខែមីនា ឆ្នាំ ២០២៤ ហើយមិនត្រូវបាននាំចេញឡើងវិញចាប់តាំងពីពេលនោះមក ក៏ដូចជាថ្មលើសពីកន្លះការ៉ាត់ដែលបំពេញលក្ខខណ្ឌដូចគ្នាកាលពីខែកញ្ញាឆ្នាំមុន។
រតនាគារបាននិយាយថា អាជ្ញាប័ណ្ណថ្មីជំនួស ការលើកលែងមុនបានចេញនាខែសីហា ឆ្នាំ ២០២៤ ដែលនឹងត្រូវផុតកំណត់នៅសប្តាហ៍ក្រោយ។ ការលើកលែងនេះមិនលុបចោល ការហាមឃាត់យ៉ាងទូលំទូលាយលើពេជ្រដែលមានដើមកំណើតពីរុស្ស៊ី ឬប្រតិបត្តិការជាមួយអង្គភាព ដែលមានទណ្ឌកម្មនោះទេ ។
ការរឹតបន្តឹងលើត្បូងរបស់រុស្ស៊ី បានអង្រួនទីផ្សារពេជ្រពិភពលោក ។ ទីក្រុងមូស្គូបានពណ៌នាការហាមប្រាមនេះថា ជាភ័ស្តុតាងបង្ហាញថា ប្រទេសលោកខាងលិចបានអស់ ជម្រើសយ៉ាងច្រើនសម្រាប់ការដាក់ទណ្ឌកម្មបន្ថែមទៀត ។ ប្រទេសរុស្ស៊ីជាប្រទេសផលិតពេជ្រ រដុបដ៏ធំបំផុតរបស់ពិភពលោក ដែលមានចំនួនប្រហែលមួយភាគបីនៃទិន្នផលសកលមុនពេលការរឹតបន្តឹងនោះ ចាប់តាំងពីពេលនោះមក បានប្តូរទិសដៅពាណិជ្ជកម្ម របស់ខ្លួនទៅកាន់ប្រទេសចិន ឥណ្ឌា អារ៉ាប់រួម អាមេនី និងបេឡារុស្ស៕
