ប្រធានក្លឹបបាល់ទាត់ វៀតណាមម្នាក់ ត្រូវបានចាប់ខ្លួន ចំពេលមានការ ស៊ើបអង្កេតគណនេយ្យ

វៀតណាម ៖ ប៉ូលីសបាននិយាយកាលពីយប់ថ្ងៃសុក្របានប្រាប់ឲ្យដឹងថា លោក Cao Tien Doan ប្រធានក្លឹបបាល់ទាត់វៀតណាម Dong A Thanh Hoa FC ត្រូវបានចាប់ខ្លួនពីបទរំលោភលើគណនេយ្យ ដោយមានផលវិបាកធ្ងន់ធ្ងរ យោងតាមការចេញផ្សាយ ពីគេហទំព័រ VN Express ។

កាលពីយប់ថ្ងៃព្រហស្បតិ៍ មន្ត្រីរាប់រយនាក់មកពីប៉ូលីសខេត្ត Thanh Hoa បានធ្វើការឆែកឆេរផ្ទះរបស់លោក Doan នៅ Sam Son Ward ភាគកណ្តាលប្រទេសវៀតណាម។ ជាមួយគ្នានោះ ប៉ូលីសបានឆែកឆេរទីស្នាក់ការកណ្តាលរបស់ក្រុមហ៊ុន Dong A នៅលើផ្លូវ Le Loi សង្កាត់ Hac Thanh ។

ភ្នាក់ងារស៊ើបអង្កេតរបស់ប៉ូលីស Thanh Hoa មិនទាន់បានបង្ហាញពីមូលហេតុពិតប្រាកដសម្រាប់ការស្វែងរកនោះទេ ប៉ុន្តែបានបង្ហាញថា វាបានធ្វើតាមរបាយការណ៍សាធារណៈចោទប្រកាន់លោក Doan ពីសកម្មភាពខុសច្បាប់។

អាជ្ញាធរសង្ស័យថា លោក Doan អាចជាប់ពាក់ព័ន្ធនឹងការរំលោភលើគណនេយ្យ ដែលបណ្តាលឲ្យមានផលវិបាកយ៉ាងធ្ងន់ធ្ងរ។

រហូតដល់ម៉ោង ១ រំលងអធ្រាត្រថ្ងៃសុក្រ ការស្រាវជ្រាវបានបន្តនៅទីតាំងទាំង ២ ។ ប៉ូលិសបាននាំយករថយន្តជាច្រើនគ្រឿងដើម្បីដឹកកុំព្យូទ័រ និងឯកសារដែលរឹបអូសពីទីស្នាក់ការ Dong A។

ក្រៅពីតួនាទីជាអគ្គនាយកក្រុមហ៊ុន Dong A Real Estate Group LLC លោក Doan មានតួនាទីជាប្រតិភូគណៈកម្មាធិការសេដ្ឋកិច្ច និងថវិកានៃក្រុមប្រឹក្សាប្រជាជន Thanh Hoa ប្រធានសមាគមធុរកិច្ច Thanh Hoa និងជាប្រធាន Dong A Thanh Hoa FC៕