កូរ៉េខាងត្បូង ៖ នេះយោងតាមការចេញផ្សាយ ពីគេហទំព័រ koreajoongangdaily បានប្រាប់ឲ្យដឹងថា គណនីអ្នកប្រើប្រាស់ Coupang ប្រហែល ៣៣.៧ លាននាក់ ត្រូវបានរងផល ប៉ះពាល់ក្នុងការលួចទិន្នន័យដ៏ធំមួយ ដែលបង្កើនការព្រួយបារម្ភ អំពីឧក្រិដ្ឋកម្មបន្ទាប់បន្សំ អាចកើតមាន រួមទាំងការបោកប្រាស់ តាមប្រព័ន្ធអេឡិចត្រូនិក និងការលួចអត្តសញ្ញាណ។
Coupang បានបង្ហាញ នៅថ្ងៃសៅរ៍ថា ព័ត៌មានផ្ទាល់ខ្លួនពីគណនីអតិថិជនប្រហែល ៣៣.៧ លាននាក់ ត្រូវបានលេច ធ្លាយដោយគ្មានការអនុញ្ញាត ។ ទិន្នន័យដែលលួចចូលរួមមានឈ្មោះ លេខទូរស័ព្ទ អាសយដ្ឋានដឹកជញ្ជូន អាសយដ្ឋានអ៊ីម៉ែល និង ព័ត៌មានលម្អិត នៃការបញ្ជាទិញមួយចំនួន។
Coupang បានសង្កត់ធ្ងន់ លើការហៅទូរសព្ទមួយថា ព័ត៌មានទូទាត់ លេខកាតឥណទាន និងពាក្យសម្ងាត់ ចូលមិនត្រូវបានលេចធ្លាយ ហើយនៅតែត្រូវបានការពារដោយសុវត្ថិភាព ប៉ុន្តែអាជ្ញាធរ និងអ្នកជំនាញព្រមានថា សូម្បីតែទិន្នន័យផ្ទាល់ខ្លួន មានកំណត់ក៏អាចត្រូវបានប្រើប្រាស់ ក្នុងការក្លែងបន្លំប្រភេទផ្សេងៗ ដូចជាការក្លែងបន្លំផ្ញើ សារជាអក្សរ និងការបន្លំសំឡេង ការឆបោកជួញដូរភាគហ៊ុន ការកាន់កាប់គណនី និងការក្លែងបន្លំឥណទាន ឬអត្តសញ្ញាណ។
នៅថ្ងៃសៅរ៍ ក្រសួងវិទ្យាសាស្ត្រ និងបច្ចេកវិទ្យាព័ត៌មាន គណៈកម្មការការពារព័ត៌មានផ្ទាល់ខ្លួន និងទីភ្នាក់ងារអ៊ីនធើណេត និងសន្តិសុខកូរ៉េ (KISA) បានចេញការ ជូនដំណឹងសុវត្ថិភាព ទូទាំងប្រទេស ដោយជំរុញឲ្យសាធារណជន ប្រុងប្រយ័ត្ន ចំពោះសារក្លែងបន្លំ ដែលសន្យាថា នឹងសងប្រាក់វិញ ឬសំណង និងការប៉ុនប៉ងបញ្ឆោត អ្នកប្រើប្រាស់ឲ្យដំឡើង កម្មវិធីបញ្ជាពីចម្ងាយ នៅលើទូរស័ព្ទ ឬកុំព្យូទ័ររបស់ពួកគេ៕
