វៀតណាម៖ យោងតាមការចេញ ផ្សាយពីគេហទំព័រ VN Express បានប្រាប់ឲ្យដឹងថា តុលាការហាណូយរបស់ប្រទេស វៀតណាមបានកាត់ទោស ប្រធានក្រុមហ៊ុន Z Holding JSC ឲ្យជាប់ពន្ធនាគាររយៈពេល ៣០ ឆ្នាំ ពីបទដំណើរការប្រតិបត្តិការ ទឹកដោះគោក្លែងក្លាយដ៏ធំមួយរកចំណូលបាន ២.៤ ពាន់ពាន់លានដុង (៩១.៣៥ លានដុល្លារអាមេរិក)។
លោក Hoang Quang Thinh អាយុ ៣១ ឆ្នាំ បានទទួលទោស ជាប់ពន្ធនាគារចំនួន ៣ បទល្មើស ដូចដែលតុលាការ ហាណូយបានសម្រេចកាលពីថ្ងៃពុធ។ បន្ទាប់ពីការកាត់ក្តីរយៈពេល ១០ ថ្ងៃ តុលាការប្រជាជនហាណូយបានរកឃើញថា ជនជាប់ចោទចំនួន ១៨ នាក់ដែលមានទំនាក់ទំនងជាមួយក្រុមហ៊ុន Z Holding មានទោស។
ស្ថាបនិកទាំង ៣ របស់ក្រុមហ៊ុនគឺលោក Thinh លោក La Khac Minh និងលោក Nguyen Van Minh ត្រូវបានរកឃើញថា មានទោសពីបទឧក្រិដ្ឋចំនួន៣ ករណីគឺ រំលោភលើបទប្បញ្ញត្តិគណនេយ្យ បង្កផលវិបាកធ្ងន់ធ្ងរ ផលិត និងជួញដូរផលិតផលអាហារក្លែងក្លាយ និងលាងលុយកខ្វក់។
មនុស្ស ១៥ នាក់ផ្សេងទៀតត្រូវបានចោទប្រកាន់ពីបទរំលោភ លើបទប្បញ្ញត្តិគណនេយ្យដែលបង្កផលវិបាកធ្ងន់ធ្ងរ ឬផលិត និងជួញដូរផលិតផលអាហារក្លែងក្លាយ ហើយត្រូវបានកាត់ទោស ឲ្យជាប់ពន្ធនាគារពី ៩ ឆ្នាំទៅ ១៥ ខែ ដោយព្យួរទោស។
តុលាការដំបូងបានសម្រេចថា វាជាករណីដ៏ធ្ងន់ធ្ងរ មួយបានរំលោភ លើសណ្តាប់ធ្នាប់សេដ្ឋកិច្ច របស់រដ្ឋដែលគ្រប់គ្រង ផលិតកម្ម និងពាណិជ្ជកម្មពាណិជ្ជកម្ម សុវត្ថិភាពចំណីអាហារ សិទ្ធិអ្នកប្រើប្រាស់ និងសណ្តាប់ធ្នាប់សាធារណៈ។ តុលាការបានពិពណ៌នាអំពីការផលិតទំនិញក្លែងក្លាយក្នុងរយៈពេលយូរ ក្នុងបរិមាណច្រើន និងច្រើនប្រភេទ រួមទាំងទឹកដោះគោសម្រាប់កុមារ និងមនុស្សចាស់ ដែលមានគ្រោះថ្នាក់ជាពិសេស៕
