ទីក្រុងឌូបៃ៖យោងតាមការ ចេញផ្សាយពីគេហទំព័រ VN Express បានប្រាប់ឲ្យដឹងថា អ្នកមានបំផុតនៅទីក្រុងឌូបៃ កំពុងប្រើប្រាស់បន្ទប់ ដ៏ប្រណីតមានខែលដ៏រឹងមាំការពាររបស់ពួកគេ ដើមឡើយពួកគេបានសាងសង់ ដើម្បីការពារការ ចាប់ជំរិត និងចោរកម្ម ឥឡូវវាបានក្លាយជាជម្រកការពារគ្រាប់បែក ក្នុងជម្លោះមជ្ឈិមបូព៌ាទៅវិញ។
ក្នុងចំណោមពួកមានដូចជាអតីតខ្សែការពារក្រុម Manchester United គឺលោក Rio Ferdinand អាយុ ៤៧ ឆ្នាំបានផ្លាស់ទៅទីក្រុងឌូបៃជាមួយភរិយារបស់លោកគឺអ្នកស្រី Kate អាយុ ៣៤ ឆ្នាំ និងកូនៗរបស់ពួកគេគឺ Shae អាយុ ២ ឆ្នាំ Cree អាយុ ៥ ឆ្នាំ និងកូនស្រីអាយុ ១៤ ឆ្នាំរបស់ Rio គឺ Tia កាលពីខែសីហាឆ្នាំមុន ។ ក្រុមគ្រួសារនេះបានចំណាយ ពេលយប់ដំបូងនៃការរំខាន ដោយជ្រកកោនក្នុងបន្ទប់ក្រោមដីនៃវិមានរបស់ពួកគេ ដែលមានតម្លៃប្រហែល ៦.៥ លានផោន (៨.៧ លានដុល្លារអាមេរិក)។
អ្នកស្រី Kate បានធានាដល់អ្នកតាមដានប្រព័ន្ធផ្សព្វផ្សាយសង្គមរបស់នាងជាមួយនឹងការអាប់ដេតសាមញ្ញមួយថា យើងត្រូវបានគេណែនាំឲ្យចូលទៅក្នុងបន្ទប់ក្រោមដីនៅយប់ដំបូង ដែលសំឡេងរំខានទាំងអស់បានចាប់ផ្តើម ហើយយើងបានដេកនៅទីនេះជាមួយភួយ និងរបស់របរផ្សេងៗទៀត។ យើងកំពុងប្រើប្រាស់កន្លែងនេះដោយឈ្លាសវៃ ហើយយើងមានសុវត្ថិភាព។
ទោះបីជា Cree និង Shae ចូលចិត្តវាក៏ដោយ ព្រោះពួកគេមិនជឿថាយើងទាំងអស់គ្នាបានដេកជាមួយគ្នានៅក្នុងបន្ទប់ក្រោមដីនោះទេ។ ដើម្បីរក្សាអារម្មណ៍ធម្មតាខ្លះ អ្នកស្រី Kate បានចែករម្លែកវីដេអូរបស់នាងកំពុងហាត់ប្រាណនៅ កន្លែងក្រោមដី ជាធម្មតាត្រូវបានប្រើជាកន្លែងហាត់ប្រាណនៅផ្ទះ ខណៈលោក Rio បាននិយាយថា ក្រុមគ្រួសារបានហាត់ប្រាណជាមួយគ្នា និងបង្រៀនកូនៗនៅផ្ទះ ដោយធ្វើត្រាប់តាមទម្លាប់ពីសម័យកូវីដ។ ទោះជាយ៉ាងណាក៏ដោយ Ferdinand ដែលតែងតែមានសុទិដ្ឋិនិយមបានទទួលស្គាល់ថាស្ថានភាពនេះបានធ្វើឲ្យគាត់ភ្ញាក់ផ្អើល។ ខ្ញុំត្រូវតែនិយាយដោយស្មោះត្រង់ទៅ វាពិតជាស្ថានភាពគួរឲ្យខ្លាចណាស់។
នេះបើយោងតាម Daily Mail បាននិយាយថា លោក Ebraheem Al Samadi ជាសហគ្រិនជនជាតិគុយវ៉ែត-អាមេរិក និងជាសមាជិកនៃរឿង Dubai Bling របស់ Netflix មានទ្រព្យសម្បត្តិសុទ្ធប្រមាណ ៣៨ លានផោន បានបង្ហោះវីដេអូមួយពីអ្វីដែលហាក់ដូចជាកន្លែងហាត់ប្រាណក្រោមដីផ្ទាល់ខ្លួនរបស់លោក ដើម្បីធានាដល់អ្នកគាំទ្រ ១.២ លាននាក់របស់លោកថា លោកមានសុវត្ថិភាព។
អចលនទ្រព្យមួយក្នុងចំណោមអចលនទ្រព្យថ្លៃបំផុតរបស់ទីក្រុងគឺ Marble Palace មានទីតាំងក្នុងសង្កាត់ Emirates Hills ផ្តាច់មុខ និងត្រូវបានលក់កាលពីឆ្នាំមុនក្នុងតម្លៃប្រហែល ៨៦ លានផោន ក៏ត្រូវបានគេជឿថា មានបន្ទប់ការពារ ជាច្រើនដែលធន់នឹងគ្រាប់បែក និងស្ថានីយថាមពលឯកជនផងដែរ។
ពិធីករទូរទស្សន៍អង់គ្លេស នាង Luisa Zissman ក៏បានពិពណ៌នាអំពីការ ឮសំឡេងផ្ទុះធំៗ ពីរដែលបានរញ្ជួយផ្ទះនៅក្បែរនោះ ខណៈនាងហៀបនឹង ចេញទៅខាងក្រៅជាមួយកូនៗរបស់នាង។
នាងបាននិយាយនៅលើបណ្តាញ សង្គម Instagram ថា យើងបានដកថយ ហើយបន្ទាប់មកបានឮសំឡេង ផ្ទុះពីរបន្ថែមទៀត ដូច្នេះឥឡូវនេះដល់ពេលមើលកុនក្នុងបន្ទប់ក្រោមដីហើយ៕
