ភ្នំពេញ៖លោក ស សុខា រដ្ឋលេខាធិការនៃក្រសួងអប់រំ យុវជន និងកីឡា និងប្រធានសហព័ន្ធកីឡាប៊ូល និងប៉េតង់កម្ពុជា និងលោក Claude Azema ប្រធានសហព័ន្ធប៉េតង់អន្តរជាតិអញ្ជើញចូលរួមព្រឹត្តិការណ៍នៃការប្រកួតកីឡាប៉េតង់ជ្រើសរើសជើងឯកពិភពលោកយុវជន និងនារី លើកទី១៧ នារសៀលថ្ងៃទី១៩ ខែវិច្ឆិកា ឆ្នាំ២០១៩ នៅពហុកីឡដ្ឋានជាតិអូឡាំពិក។
លោក ស សុខាបានមានប្រសាសន៍ថា ខ្ញុំជាប្រធានសហព័ន្ធប៊ូលនិងប៉េតង់នៃប្រទេសកម្ពុជា និងគណៈកម្មាធិការទូទៅនៃការប្រកួតកីឡាយុវជន និងនារីពិភពលោកប៉េតង់ទី ១៧ សូមថ្លែងអំណរគុណចំពោះលោកClaude Azema ប្រធានសហព័ន្ធអន្តរជាតិ (FIPJP) គណៈកម្មាធិការបច្ចេកទេសអន្តរជាតិនិងប្រទេសចំនួន ៤៩ ផ្សេងទៀតដែលបានផ្តល់ឲ្យយើងនូវឱកាស និងការជឿជាក់លើពួកយើងឲ្យធ្វើជាម្ចាស់ផ្ទះការប្រកួតនេះ ហើយខ្ញុំសូមស្វាគមន៍យ៉ាងកក់ក្តៅចំពោះប្រតិភូ គ្រូបង្វឹក និងកីឡាករទាំងអស់ដែលមកពី ៤៩ ប្រទេស (៨០ ក្រុម) មកផ្ទះរបស់យើង។ ព្រឹត្តិការណ៍នេះបង្ហាញពីការរីកចម្រើនជាវិជ្ជមាននៃកីឡា ប៉េតង់នៅកម្ពុជាលើឆាកអន្តរជាតិដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជាដោយឈរលើមូលដ្ឋានសន្តិភាពស្ថិរភាពនយោបាយនិងវឌ្ឍនភាពលើគ្រប់វិស័យរបស់រដ្ឋាភិបាលតាមរយៈ ការអនុវត្តដំណាក់កាលទី ៤ នៃយុទ្ធសាស្ត្រចតុកោណដំណាក់កាលទី ៤ និងចក្ខុវិស័យនៃទិសដៅបន្ទាប់របស់រដ្ឋាភិបាលកម្ពុជានឹងក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានប្រាក់ចំណូលខ្ពស់នៅឆ្នាំ ២០៥០ ។
លោកបានបន្តថា ក្រៅពីការឈ្នះនិងចាញ់ការប្រកួតប្រជែងនេះផ្តោតលើកិច្ចសហប្រតិបត្តិការការប្រាស្រ័យទាក់ទងនិងមិត្តភាពក្នុងគោលបំណងភ្ជាប់ទំនាក់ទំនងរវាងប្រជាជាតិភាសា និងសាសនាផ្សេងៗគ្នាដើម្បីចែករម្លែកទស្សនៈរួមមួយសម្រាប់ភាពសុខដុមនៃគ្រួសារប៉េតង់។ ប្រទេសកម្ពុជាបានក្លាយជាសមាជិកនៃ FIPJP ចាប់តាំងពីឆ្នាំ ១៩៩៣។ រហូតមកដល់ពេលនេះយើងត្រូវបានគេស្គាល់ថាជា ប្រទេសមួយដែលមានឥទ្ធិពលបំផុតនៅក្នុងការប្រកួតប៉េតង់ទាំងក្នុងតំបន់និងអន្តរជាតិដោយសារតែដណ្តើមមេដាយមាស ប្រាក់ និងសំរិទ្ធជាច្រើន។
លោកប្រធានបន្ថែមថា ប្រទេសកម្ពុជាពិតជាមានកិត្តិយសណាស់ដែលមានឱកាសធ្វើជាម្ចាស់ផ្ទះសម្រាប់ការប្រកួតកីឡាប៉េតង់ពិភពលោកនេះជាលើកដំបូង ដោយសារតែស្នាដៃសម្តេចក្រឡាហោម ស ខេង និងសម្តេចវិបុលបញ្ញា សុខ អាន បានកសាងគ្រឹះរឹងមាំ និងត្រួសត្រាយផ្លូវរលូនសម្រាប់យើងទាំងអស់គ្នាចូលរួមនឹងឆន្ទៈការទទួលខុសត្រូវ និងការលះបង់សម្រាប់សហព័ន្ធប៊ូលនិងប៉េតង់កម្ពុជារបស់យើង សម្រាប់មនុស្សជំនាន់ក្រោយរក្សានិងបន្ត និងឆន្ទៈក្នុងការត្រៀមខ្លួនធ្វើជាម្ចាស់ផ្ទះនៃការប្រកួតកីឡាស៊ីហ្គេមឆ្នាំ ២០២៣ លើកទី ៣២ នាពេលខាងមុខនេះ៕
