សករាជថ្មីនៃកម្មវិធី អធិរាជគុនខ្មែរ ISI PALM-ISI PIPE រដូវកាលទីពីរ នឹងចូលមកដល់ នៅថ្ងៃអាទិត្យ ទី០៥ ខែមករា ឆ្នាំ២០២០ ដែលត្រូវស្វែងរក ជើងខ្លាំង អនាគតម្ចាស់ ខ្សែក្រវាត់មាស បន្ទាប់ពីរដូវកាលទីមួយ ត្រូវបានគ្រប់គ្រងដោយឡៅ ចិត្រា ក្នុងប្រភេទទម្ងន់ ៦៩គីឡូក្រាម។
រដូវកាលថ្មី កំពូលអ្នកប្រដាល់គុនខ្មែរ៨រូប ក្នុងប្រភេទទម្ងន់៥៧គីឡូក្រាម នឹងចេញដណ្ដើម ច្បាមឱកាសទៅគ្រប់គ្រង ខ្សែក្រវាត់មាសវិញ។
នៅសប្ដាហ៍បើកឆាក ជម្រុះខ្សែក្រវាត់ ប្រាក់មុនឈានទៅផ្សងព្រេង ប្រជែងខ្សែក្រវាត់ ម៉ន អ្នកលេងគុនខ្មែរ មាឌល្អិតចិត្តធំកណ្ដាប់ដៃអន្ទងសង្ខារ ត្រូវតទល់ខ្លាចង្កូមពិឃាដ ផ្សាក់អិនស៊ី។
ចំណែកជំនួបអន្តរជាតិ ដ៏កក្រើក គឺរាហ៊ូមាសបាត់ដំបង ឈុត សេរីវណ្ណថង ល្បងក្បាច់វ៉ៃប្រហារ តទល់ជើងខ្លាំងថៃ និតិកន។
ក្រៅពីនេះ ក៏នៅមានគូពន្លកគុនខ្មែរ លំដាប់ជួរមុខ គឺអ្នកប្រយុទ្ធវ័យក្មេង កំពុងឡើងកូដ អេលីត ផានិត ដាក់ចិត្តយកជ័យ លើអ្នកលេងក្បាច់រហ័ស សួរ ចាន់រាជ ខណៈអ្នកប្រយុទ្ធ ថ្នាលមុតស្រួច សៅ សេងហុង ប្រឈមមុខនឹង នាគរាជជំទង់ ប៊ន ពន្លឹក។
គួរបញ្ជាក់ថា បេក្ខជនកម្ពុជាទាំង៨រូប ដែលត្រូវប្រជែងខ្សែក្រវាត់មាស រដូវកាលទីពីរ អធិរាជគុនខ្មែរ ISI PALM-ISI PIE មានម៉ន សាម៉េត, វ៉ាន់ វឿន, អេ ណារ័ត្ន, ពេជ្រ ម្ទេសខ្មាំង, លាភ រដ្ឋា, ប៊ុន សុធា, អេលីត ចំរើន និងឃួន ឡាំងកូស៊ីន។
សម្រាប់រូបមន្ត គឺមិនខុសពីរដូវកាលទីមួយទេ ដោយមួយសប្ដាហ៍ មានការប្រកួត ខ្សែក្រវាត់មួយគូ៕ ដោយ:លី ភីលីព
