ភ្នំពេញ៖ អ្នកប្រដាល់ តូច ទួ សមាគមន៏កីឡាប្រដាល់ក្រសួងការពារជាតិ ប៉ះអ្នកប្រដាល់អាមេរិក Martin Allen ប្រភេទទម្ងន់ ៦៣គីឡូក្រាម ខណៈអ្នកប្រដាល់ រិន សារ័ត្ន ក្លិបកងទ័ពជើងទឹកប្រកួត ជាមួយអ្នកប្រដាល់ថៃ Avout Lek ប្រភេទទម្ងន់៦៣,៥០គីឡូក្រាម រីឯអ្នកប្រដាល់កម្ពុជា ពុយ វណ្ណៈ ក្លិបឃ្លាំងមឿងកីឡា ខេត្តពោធិ៍សាត់ ប៉ះអ្នកប្រដាល់ថៃ Cheik Sayam ប្រភេទទម្ងន់៦៣,៥០គីឡូក្រាម នៃព្រឹត្តិការណ៍ប្រដាល់ដណ្តើមនៅសង្វៀន Boostrong Fighter On Fire របស់ SEATV នាព្រឹកថ្ងៃអាទិត្យ ទី២៣ ខែកុម្ភៈ ឆ្នាំ២០២០នេះ។
លោក ញាណ សុធី អ្នកចាត់ចែងកម្មវិធីប្រដាល់ប្រចាំ SEATV បានឲ្យដឹងថា អ្នកប្រដាល់អាមេរិក Martin Allen ជាអ្នកប្រដាល់ដែលសំបូរកលល្បិចគ្រាន់បើដែរ ហើយរូបគេមានរបៀបវ៉ៃ របស់គេគឺវ៉ៃដោយមិនបង្ខំ គេវ៉ៃចេញមួយៗ តែច្បាសាំហើយវ៉ៃចេញភាគច្រើន ចំគោលដៅបានល្អ ថែមទាំងប្រកួត៤១ដង ឈ្នះ៣១ដង ចាញ់១០ដង និងមិនដែរស្មើ ។
អ្នកប្រដាល់អាមេរិករូបនេះ មានសមត្ថភាពបច្ចេកទេស ប្រដាល់កម្រិតខ្ពស់ ដែលតូច ទួ មិនអាចមើលស្រាលបានឡើយ។ ចំពោះតូច ទួ ព្យាយាមស្ដារកេរ្តិ៍ឡើងវិញ សម្បើមណាស់តែអ្វីៗនៅមិនទាន់វិលមក ដូចដើមនៅឡើយទេ បន្ទាប់ពីស្រុតចុះខ្លាំងនោះស្ទើរតែ គ្រប់សង្វៀនទាំងអស់ មិនមានសង្វៀនណាមួយផ្ដល់ឱកាសឲ្យអ្នកប្រដាល់រូបនេះបានឡើងប្រកួតឡើយ ។ ប៉ុន្មានប្រកួតចុងក្រោយនេះគេធ្វើបាន ល្អខ្លះនិងមិនបានល្អខ្លះ ។
អ្នកប្រដាល់ល្អទាំងការការពារ ទាំងការវាយលុកតែជើងក្រោម របស់តូច ទួមិនជារឹងមាំនោះទេតែ បន្ទាប់ពីគេព្យាយាមហ្វឹកហាត់ឡើងវិញនោះ គូប្រកួតក៏មិនងាយនឹងវាយប្រហារ ជើងគេបានឡើយ ព្រមទំាងប្រកួត៧៤លើក ឈ្នះ៦៣លើក ចាញ់១១លោក និងមិនដែរស្មើ ។ ចំណែកអ្នកប្រដាល់ រិន សារ័ត្ន ក្លិបកងទ័ពជើងទឹកប្រកួតជាមួយអ្នកប្រដាល់ថៃ Avout Lek ។ រិន សារ័ត្ន មួយរយៈនេះគេហាក់ដូចជាស្រុតចុះ ខ្លាំងណាស់ទោះបីរបៀបវ៉ៃ របស់គេនៅតែល្អក៏ពិតមែន និងនៅរហ័សក៏ពិតមែនតែកម្លាំង និង ទឹកចិត្តរបស់គេស្រុតចុះខ្លាំងណាស់ ។ រិន សារ័ត្ន ប្រកួត៦០ដង ឈ្នះ៤៤ដង ចាញ់១៣ដង និងស្មើ៣ដង ។
អ្នកប្រដាល់ថៃរូបនេះ មានថ្វីដៃល្អ និងវាយខ្លាំងគួរសមដែរ ដោយសារគេជាជើងខ្លាំងនៅស្រុកថៃ Avout Lek ប្រកួត៧២លើក ឈ្នះ៥៨លើក និងចាញ់១៤លើក មិនដែលស្មើ ។ ដោយឡែកអ្នកប្រដាល់កម្ពុជា ពុយ វណ្ណៈ ក្លិបឃ្លាំងមឿងកីឡា ខេត្តពោធិ៍សាត់ ប៉ះអ្នកប្រដាល់ថៃ Cheik Sayam ប្រភេទទម្ងន់៦៣,៥០គីឡូក្រាម។ អ្នកកប្រដាល់ ពុយ វណ្ណៈ និង Cheik Sayam មានសមត្ថភាព ប្រហាក់ប្រហែលគ្នាទេ ហើយមានមាឌប្រហែលគ្នា និងកម្ពស់ក៏ប្រហាក់ប្រហែលគ្នាដែរ ។ Cheik Sayam ល្អ និងខ្លាំងជាង ពុយ វណ្ណៈ ប៉ុន្តែវណ្ណៈមួយរយៈចុងក្រោយនេះ គេក៏មានការរីកចម្រើនដែរ ហើយរបៀបវាយរបស់គេ ក៏នៅតែល្អ និងនៅរហ័ស ហើយកម្លាំង និងទឹកចិត្តរបស់គេក៏ធំដែរ។ Cheik Sayam ប្រកួត៧១លើក ឈ្នះ៥៨លើក និង ចាញ់១៣លើក មិនដែលស្មើ ចំណែកពុយ វណ្ណៈប្រកួត៧៣លើក ឈ្នះ៥៥លើក ចាញ់១៦លើក និងស្មើ ២លើក ៕
