ពេលវេលា នៃការដោះដូរកីឡាករ ស្ទើរតែខិតជិតមកដល់ទៅហើយ ប៉ុន្តែ Real Madrid ទើបតែបានប្រកាស មកចូលរួមប្រកួតប្រជែង ក្នុងការដណ្តើមកុងត្រា របស់កីឡាករ Kai Havertz ជាមួយនឹងក្លឹបផ្សេងទៀតដែរ។
ក្លឹបយក្សអេស្បាញនេះ ត្រូវបានគេដឹងថា ជាក្លឹបចុងក្រោយហើយ ដែលបានចុះឈ្មោះ ក្នុងការចូលរួមប្រជែង ហើយខណៈដែលបច្ចុប្បន្ន Chelsea កំពុងស្ថិតនៅក្នុងទីតាំង នាំមុខគេក្នុងការប្រជែង យកកីឡាករឆ្នើមវ័យក្មេង របស់ក្លឹប Leverkusenរូបនេះ។ Havertz ត្រូវបានគេចាត់ទុកថា ជាកីឡាករវ័យក្មេងល្អបំផុត របស់ប្រទេសអាល្លឺម៉ង់ ចាប់តាំងតែពីជំនាន់ របស់អតីតកីឡាករ Michael Ballackមក។
គួរបញ្ជាក់ដែរថា កាលពីថ្ងៃអង្គារដើមសប្តាហ៍ កន្លងទៅ The Sunsports បានចេញផ្សាយ ដោយមានទំនុកចិត្តថា ក្លឹបតោខៀវChelsea គឺជាក្លឹបតែមួយគត់ ដែលអាចនាំយកកីឡាករតម្លៃខ្លួន ៧០លានផោនរូបនេះ ចេញពីអាល្លឺម៉ង់បាន ទោះបីជាមានក្លឹបយក្ស នៅអ៊ឺរ៉ុបផ្សេងទៀត ប្រជែងដែរក្តី៕
ប្រែសម្រួល៖ស៊ុនលី
