មានការអះអាងមួយនៅថ្ងៃនេះ ដោយកីឡាករខ្សែការពារ Luke Shaw ថាកីឡាករ Marcus Rashford គឺកំពុងដើរលើផ្លូវមួយ ដើម្បីក្លាយខ្លួនទៅជាអ្នក ដែលអាចដណ្តើមពានរង្វាន់ Ballon d’Or យកមកគ្រប់គ្រងបាន នាពេលអនាគត។
Shaw បាននិយាយបែបនេះថា Rashford ជាកីឡាករ ដែលមានទំរង់លេង មិនអាចបញ្ឈប់បានងាយៗឡើយ កាលពីមុនខែមករា ជាពេលដែលគាត់បានទទួលរងរបួសខ្នង និងត្រូវសម្រាកព្យាបាលរហូតមក ប៉ុន្តែក្នុងអំឡុងពេល ដែលកូវីដ១៩បានមកដល់ និងជិតចប់ទៅវិញហើយនោះ កីឡាកររូបនេះ បានបង្កើនការហ្វឹកហាត់ទ្វេរដង ទាំងនៅផ្ទះ និងនៅទីលានហ្វឹកហាត់។
Shaw បាននិយាយទៀតថា ក្នុងអាយុទើបតែ២២ឆ្នាំផង ប៉ុន្តែ Rashford គឺនៅសល់ផ្លូវវែងឆ្ងាយ និងកំពុងឆ្ពោះទៅរកឈ្មោះ ជាកីឡាករល្អបំផុត លើលោកជាមិនខាន។
ក្នុងការប្រកួតលក្ខណៈមិត្តភាព កាលពីសប្តាហ៍មុន Rashford ដែលបានត្រឡប់ មកហ្វឹកហាត់ពេញលេញផងនោះ បានស៊ុតបញ្ចូលទី២ គ្រាប់ម្នាក់ឯងផងដែរ៕
ប្រែសម្រួល៖ស៊ុនលី
