Bruno Fernandes ជឿជាក់ថាប្រសិនបើ Manchester United អាចឈ្នះពានរង្វាន់ Europa League បាននៅរដូវកាលនេះ នោះក្រុមកាន់តែមានកម្លាំងចិត្តថែមទៀតសម្រាប់លេង Premier League រដូវកាលក្រោយ។
ក្រុមបិសាចក្រហម Man Utd បានឡើងដល់វគ្កពាក់កណ្ដាលផ្ដាច់ព្រ័ត្រហើយក្នុងពានរង្វាន់ Europa League ដោយត្រូវប៉ះក្រុម Sevilla ដែលជាជើងខ្លាំងមកពីអេស្ប៉ាញ។ សម្រាប់ការប្រកួតពានរង្វាន់លំដាប់ទី២នៅអឺរ៉ុបនេះ Bruno ដែលជាតួអង្គសំខាន់ក្នុងក្រុមបិសាចក្រហម យល់ឃើញថាបើបានឈ្នះពាននេះ នោះក្រុមនឹងកាន់តែមានទំនុកចិត្តថែមទៀតសម្រាប់រដូវកាលក្រោយលេងនៅលីគកំពូលអង់គ្លេស។
កីឡាករព័រទុយហ្គាល់បានបញ្ជាក់ថាក្លឹប Man Utd ជាក្លឹបធំមួយដូច្នេះការឈ្នះពានរង្វាន់គឺជារឿងចាំបាច់បំផុត។ Europa League បើអាចលើកបានឆ្នាំនេះ នោះនឹងធ្វើឱ្យកីឡាករមានកម្លាំងចិត្តកាន់តែខ្លាំងសម្រាប់រដូវកាលក្រោយ។ ត្បិតអីការប្រកួតនៅសល់២ប្រកួតទៀតក្នុងពាន Europa League ដែលសុទ្ធតែពិបាក ក៏ Bruno យល់ឃើញថាក្រុមរបស់ខ្លួនមានសមត្ថភាពគ្រប់គ្រាន់សម្រាប់ឈ្នះពានរង្វាន់នេះដែរ៕
ដោយ ៖ sabay
