ភ្នំពេញ៖ ព្រឹត្តិការណ៍ការប្រកួតកីឡាប្រដាល់គុនខ្មែរ TV5 Boxing Knock-Out Serie by Cellcard នៅថ្ងៃសៅរ៍ទី ១៩ ខែកញ្ញា ឆ្នាំ២០២០ អ្នកប្រដាល់ជើងខ្លាំងវ័យក្មេង២រូបទៀតហើយត្រូវប្រកួតប្រជែងគ្នាដណ្ដើមយកកៅអីឡើងវគ្គជម្រុះជុំទី២នាសង្វៀនព្រែកកំពីស TV5 ។
អ្នកប្រដាល់ ពេជ្រ ប៊ុនសិទ្ធ ក្លិបចលនាយុវជនកម្ពុជា១៥៧គុនខ្មែរជួបជាមួយអ្នកប្រដាល់ជាយដែន ភួន ឡាំកូស៊ីន ក្លិបសាន់យ៉ាន់នាគាក្នុងប្រភេទទម្ងន់៥៤គីឡូក្រាមដូចគ្នា ។ ប៊ុនសិទ្ធ មានប្រវត្តិប្រកួតចំនួន៦៨ដង ឈ្នះ៥០ដង ចាញ់១០និងស្មើពិន្ទុ៨ដង ហើយរូបគេជាអ្នកប្រដាល់ចូលចិត្តវ៉ៃប្ដូរកែងនិងជង្គង់មិនតែប៉ុណ្ណោះគេវ៉ៃមិនសូវចេះសន្សំសំចៃកម្លាំងឡើយ ។
ចំពោះភួន ឡាំកូស៊ីនវិញមួយរយៈនេះទទួល បានចាប់អារម្មណ៍យ៉ាងខ្លាំង ដោយសារតែគេមានរបៀបវ៉ៃ យ៉ាងពិសេសគឺល្អទាំងវ៉ៃលុក និង ល្អទាំងការការពារមិនតែប៉ុណ្ណោះកម្លាំងគេក៏ល្អ ។អ្នកប្រដាល់ជាយដែនរូបនេះមានប្រវត្តិប្រកួត៤៥ដង ឈ្នះ៣៥ដង ចាញ់៧ដង និងស្មើពិន្ទុ៣ដង ។
សូមបញ្ជាក់៖មកទល់ពេលនេះ មានអ្នកប្រដាល់ចំនួន៣រូបហើយដែលបានកក់កៅអៅ សម្រាប់ប្រកួតបន្តនៅវគ្គជម្រុះជុំទី២ហើយក៏មានអ្នកប្រដាល់៣រូប ដែរដែលខ្ទាតចេញពីការប្រកួតនោះ៕
