ភ្នំពេញ៖ព្រឹត្តិការណ៍ការប្រកួតកីឡាប្រដាល់ គុនខ្មែរពានរង្វាន់ TV5 Boxing Knock-Out Series by Cellcard ក្នុងប្រភេទទម្ងន់៥៤គីឡូក្រាម នាយប់ថ្ងៃដៅរ៍ ទី២៦ ខែកញ្ញា ឆ្នាំ២០២០ នេះអ្នកប្រដាល់ ២រូបទៀតហើយ ដែលត្រូវប្រជែងគ្នាដណ្ដើមយកកៅអី សម្រាប់វគ្គជម្រុះជុំទី២ ។
អ្នកប្រដាល់ សូដា សុវណ្ណម៉ាយ ក្លិបគោព្រៃគុនខ្មែរប្រកួតជាមួយអ្នកប្រដាល់ បាង កានុន ក្លិបអាណាចក្រគុនខ្មែរ ។ សម្រាប់អ្នកប្រដាល់ទាំង២រូបនេះពួកគេមានឈ្មោះបោះសំឡេងប្រហាក់ប្រហែលគ្នាប៉ុណ្ណោះ តែបាង កានុនមួយរយៈនេះ គេហាក់ដូចជាមានការប្រកួតច្រើនជាង ។ សូដា សុវណ្ណម៉ាយមានថ្វីកណ្ដាប់ដៃល្អធ្ងន់និងវ៉ៃចេញបានរហ័ស ចំពោះជង្គង់ និងកែងរបស់គេមិនសូវជាអស្ចារ្យនោះឡើយ ព្រមទំាង មានប្រវត្តិប្រកួតចំនួន២៥លើក ឈ្នះ១៦លើក ចាញ់៧លើក និងស្មើពិន្ទុ២លើក ។
ចំពោះបាង កានុនវិញ ជាអ្នកប្រដាល់ចូលចិត្តប្រើកែង និងជង្គង់វាយប្រហារគូប្រកួតណាស់ ។ទោះបីកណ្ដាប់ដៃរបស់គេមិនដល់សុវណ្ណម៉ាយក៏ពិតមែនតែកែងរបស់គេមិនដែលប្រណីដល់គូប្រកួតឡើយ ។ ចំពោះជង្គង់របស់គេ ក៏វ៉ៃចេញបានល្អនិងចំគោលដៅបានល្អ រីឯស្នៀតទាត់របស់គេមិនអាចមើលស្រាលបានឡើយ ។អ្នកប្រដាល់រូបនេះ មានប្រវត្តិប្រកួតចំនួន៣៥លើក ឈ្នះ២២លើក ចាញ់១១លើក និងស្មើពិន្ទុ២លើក ៕ដោយ៖លី ភីលីព
