ភ្នំពេញ៖ ក្រុមកីឡាសីដក់ក្រសួងការពារជាតិ និងក្លិបសីដក់មជ្ឈមណ្ឌលកីឡាកងយោធពលខេមរភូមិន្ទ នៅតែរក្សជើងខ្លាំងរបស់ខ្លួននៃព្រឹត្តការណ៍ ការប្រកួតកីឡាសីដក់ជើងឯកថ្នាក់ជាតិឆ្នាំ២០២០ រៀបចំឡើងដោយសហព័ន្ធកីឡាសីដក់ និងឈិនឡូនកម្ពុជា ដោយគាំទ្រថវិការបស់ក្រសួងអប់រំយុវជន និងកីឡា។
ក្នុងឳកាសពិធីបិទជាផ្លូវការ នៃការប្រកួតនៅវិមាននៃពហុកីឡដ្ឋានជាតីអូឡាំពិក ដោយមានការអញ្ជើញចូលរួមពីសំណាក់បណ្ឌិត មាស សារិន ប្រធានសហព័ន្ធកីឡាសីដក់ និងឈិនឡូនកម្ពុជា លោក ម៉ិល កាដូ អគ្គនាយករងកីឡាតំណាងឲ្យលោក អ៊ុក សិទ្ធិជាតិអគ្គនាយកនៃអគ្គនាយកដ្ឋានកីឡាថ្ងៃទី៩ ខែមករា ឆ្នាំ២០២១ក្នុងវិមាននៃពហុកីឡដ្ឋានជាតិ។
ឆ្លងកាត់ការប្រកួតរយៈពេល៣ថ្ងៃ ក្រុមកីឡាសីដក់ក្រសួងការពារជាតិ និងក្លិបសីដក់មជ្ឈមណ្ឌលកីឡាកងយោធពលខេមរភូមិន្ទ ដណ្តើមបានមេដាយច្រើនជាងគេក្នុងនោះក្រុមកីឡាសីដក់ក្រសួងការពារជាតិ ទទួលបានមេដាយមាស១ មេដាយប្រាក់២គ្រឿង និងសំរិទ្ធ១គ្រឿង ចំពោះក្រុមកីឡាសីដក់ មជ្ឈមណ្ឌលកីឡាកងយោធពលខេមរភូមិន្ទទទួលបានមេដាយមាស១ មេដាយប្រាក់១គ្រឿង និងសំរិទ្ធ១គ្រឿង និងក្រុមកីឡាសីដក់ក្រសួងមហាផ្ទៃទទួលបានមេដាយមាស១ និងក្រុមកីឡាសីដក់ដេអិនទទួលបានសំរិទ្ធ១គ្រឿង។
ចំណែកវិញ្ញសា ក្រុមបុរស ៣នាក់ ទល់ ៣នាក់ចំណាត់ថ្នាក់៖មេដាយមាស បានលើក្រសួងការពារជាតិ មេដាយប្រាក់បានលើមជ្ឈមណ្ឌល ខ.ភ.ម និងមេដាយសំរិទ្ធបានលើដេអិន។ វិញ្ញសាក្រុមបុរស ២នាក់ ទល់ ២នាក់៖មេដាយមាសបានលើក្រសួងមហាផ្ទៃ មេដាយប្រាក់បានលើក្រសួងការពារជាតិ មេដាយសំរិទ្ធបានលើមជ្ឈមណ្ឌល ខ.ភ.ម ដោយឡែកវិញ្ញសាក្រុមនារី ២នាក់ ទល់ ២នាក់មេដាយមាសបានលើមជ្ឈមណ្ឌល ខ.ភ.ម. មេដាយប្រាក់បានលើក្រសួងការពារជាតិ(២) មេដាយសំរិទ្ធបានលើក្រសួងការពារជាតិ(១)៕
ដោយ៖លី ភីលីព
