ក្រោយពីឈ្នះក្លឹប Burnley ក្លឹប Manchester United បានឡើងមកឈរនៅលើកំពូលតារាងនៃក្របខ័ណ្ឌ Premier League ដោយមាន ៣៦ពិន្ទុ ដែល ៣ពិន្ទុលើសក្លឹបលេខ ២ Liverpool។ គេកម្រឃើញក្លឹបបិសាចក្រហមនៅកំពូលតារាងលីគណាស់នៅប៉ុន្មានឆ្នាំចុងក្រោយនេះ សូម្បីតែឈរបាន ១ប្រកួតក៏ដោយ។ អញ្ចឹងលើកចុងក្រោយបង្អស់ United បានស្គាល់រសជាតិដំបូលតារាងនៅឆ្នាំណា?
តាមពិតទៅ បិសាចក្រហមខកខានប៉ះក្លិនកំពូលតារាងលីគអង់គ្លេសអស់រយៈពេល ៣ឆ្នាំ ៤ខែមកហើយ។ លើកចុងក្រោយបង្អស់ដែលក្លឹបនេះឡើងទៅដល់កំពូលតារាងគឺនៅខែកញ្ញា ឆ្នាំ២០១៧ ដោយពេលនោះស្ថិតក្រោមការដឹកនាំរបស់លោក Jose Mourinho។ យ៉ាងណាមិញ ក្លឹបនេះនៅលេខ ១ បានតែ ៤ប្រកួតប៉ុណ្ណោះ ដោយចាប់ពីសប្ដាហ៍ទី ៥ទៅ United នៅលេខ ២ ក្រោមអ្នកជិតខាង City រហូតដល់ចប់រដូវកាល។
លេខមួយលើកនេះគឺលេខមួយក្រោយបុណ្យគ្រិស្តម៉ាស ដោយលើកចុងក្រោយដែល Manchester United លេខមួយក្រោយបុណ្យនេះគឺនៅឆ្នាំ២០១២ឯណោះ ដែលឆ្នាំនោះជាឆ្នាំលើកពាន Premier League។
មានមតិមួយចំនួនបង្ហាញពីក្ដីសង្ឃឹមថា Man Utd អាចនឹងធ្វើបានល្អជាងពេលណាៗទាំងអស់ក្នុងរជ្ជកាលរបស់លោក Ole Gunnar Solskjaer៕
ប្រភព៖sabay
