OTTAWA ៖ នាយករដ្ឋមន្រ្តីកាណាដា លោក Justin Trudeau បាននិយាយថា ការធ្វើជាម្ចាស់ផ្ទះ នៃព្រឹត្តិការណ៍កីឡាអូឡាំពិក រដូវរងារឆ្នាំ ២០២២ របស់ទីក្រុងប៉េកាំង ផ្តល់ឱកាស ដល់ប្រទេស ដែលមានក្តីបារម្ភក្នុងការដាក់សម្ពាធ លើប្រទេសចិនលើកំណត់ត្រា សិទ្ធិមនុស្សរបស់ខ្លួន យោងតាមការចេញផ្សាយ ពីគេហទំព័រជប៉ុនធូដេ ។
លោក Trudeau បានបន្តថា ប្រទេសចិននឹងផ្លាស់ប្តូរអាកប្បកិរិយារបស់ខ្លួនតែប៉ុណ្ណោះ ប្រសិនបើប្រឈមមុខនឹងរណសិរ្សសាមគ្គីភាព ។ លោកបន្ថែមថា លោកនឹងលើកយកបញ្ហានេះ នៅក្នុងកិច្ចប្រជុំកំពូល របស់ក្រុមមេដឹកនាំ ៧ ក្រុមនៅសប្តាហ៍ក្រោយ ។
លោក Trudeauបានប្រាប់ Toronto Star ក្នុងបទសម្ភាសន៍ ជាវីដេអូថា សម្ពាធមកលើប្រទេសចិន នាពេលបច្ចុប្បន្នពី សហគមន៍អន្តរជាតិ គឺមានសភាពធ្ងន់ធ្ងរ ជាពិសេសនៅពេលព្រឹត្តិការណ៍អូឡាំពិក រដូវរងារនឹងកើតឡើងនៅក្នុងប្រទេសចិននៅឆ្នាំក្រោយ ។ វាងាយស្រួលសម្រាប់ប្រទេសចិន ដើម្បីកាត់ផ្តាច់នូវអ្វី ដែលប្រទេសណាមួយរាប់បញ្ចូលទាំង សហរដ្ឋអាមេរិក តែឯង ប៉ុន្តែនៅពេលសហគមន៍ ពិភពលោករួមគ្នានោះ វាចាប់ផ្តើមបង្កើតការគណនាផ្ទាល់ ខ្លួនរបស់ពួកគេ ។
ប្រទេសកាណាដាដែលជាប់ នៅក្នុងជម្លោះការទូត និងពាណិជ្ជកម្ម ដ៏ធំមួយ ជាមួយប្រទេសចិន អស់រយៈពេលជាង២ឆ្នាំ គឺជាប្រទេសមួយក្នុងចំណោមប្រទេស កីឡារដូវរងាឈានមុខគេ នៅលើពិភពលោក។ លោក Trudeau មិនបានលើកឡើង នូវសំណួររបស់អត្តពលិក ដែលនៅឆ្ងាយពីព្រឹត្តិការណ៍ កីឡានេះទេ ។ គណៈកម្មាធិការ អូឡាំពិកកាណាដា ប្រឆាំងនឹងការធ្វើពហិកា ដោយនិយាយថា ខ្លួននឹងមិនបង្ខំឲ្យមានការផ្លាស់ប្តូរ កំណត់ត្រាសិទ្ធិមនុស្ស របស់ប្រទេសចិនទេ ។
ប្រធានសភាតំណាងរាស្រ្ត សហរដ្ឋអាមេរិក លោកស្រី Nancy Pelosi កាលពីខែមុន បានអំពាវនាវ ឲ្យមានការធ្វើពហិការការទូត របស់សហរដ្ឋអាមេរិក នៅឆ្នាំក្រោយដោយលើកឡើង ពីការសន្និដ្ឋាន របស់ក្រសួងការបរទេសថា ការប្រល័យពូជសាសន៍ លើជនជាតិ អ៊ុយហ្គួរ និងជនជាតិភាគតិចដទៃទៀត កំពុងកើតឡើងនៅក្នុងប្រទេសចិន ។
សភារបស់ប្រទេសកាណាដា បានអនុម័ត នូវចលនាមិនជាប់កាតព្វកិច្ចមួយ នៅក្នុងខែកុម្ភៈដោយនិយាយថា ការប្រព្រឹត្តរបស់ចិន ចំពោះជនជាតិអ៊ុយហ្គួរនៅតំបន់ស៊ីនជាំង គឺជាអំពើប្រល័យពូជសាសន៍ ៕ដោយ៖លី ភីលីព
