ក្រុមបែលហ្សិក នឹងត្រូវប្រកួតជាមួយក្រុមអ៊ីតាលី នៅម៉ោង២ រំលងអាធ្រាត្រនេះហើយ សម្រាប់ការប្រកួតពានរង្វាន់ Euro 2020 វគ្គ៨ក្រុមចុងក្រោយ។
ជំនួបមួយនេះពិតជាតឹងតែងខ្លាំងមែនទែនហើយ ព្រោះថាក្រុមទាំងពីរខាងលើនេះល្អដូចគ្នា។ បែលហ្សិកដែលកំពុងឈរនៅលេខ១ FIFA Ranking នោះ បានទម្លាក់ព័រទុយហ្គាល់ដើម្បីឡើងមកដល់វគ្គនេះ។ ដោយឡែកអ៊ីតាលីឯណោះវិញ កំពុងកាន់កំណត់ត្រាល្អណាស់ ដោយ៣០ប្រកួតមកនេះមិនទាន់ស្គាល់បរាជ័យនោះទេ។
សម្រាប់គូដ៏ជក់ចិត្តនេះ លោក Jose Mourinho ដែលនឹងចូលកាន់តំណែង ជាអ្នកចាត់ការក្រុម Roma នៅថ្ងៃនេះដែរនោះ បានបង្ហាញចំណាប់អារម្មណ៍ព្យាករថា រវាងក្រុមទាំងពីរ លោកសុំជ្រើសយកអ៊ីតាលីហើយ ។ ការរើសនេះ ក៏ដោយសារតែលោក នឹងដឹកនាំក្រុមបាល់ទាត់ នៅអ៊ីតាលីដូចគ្នា ។ ដោយឡែក៣ក្រុមទៀតដែលត្រូវឡើង វគ្គពាក់កណ្ដាលផ្ដាច់ព្រ័ត្រនោះ លោក Jose រើសយកអេស្ប៉ាញ អង់គ្លេស និងដាណឺម៉ាក ៕
