LOS ANGELES៖កីឡាករវាយកូនបាល់ពិភពលោក Novak Djokovic បានបញ្ជាក់ពីការដកខ្លួនរបស់លោកពីការប្រកួត ATP Masters នាខែនេះនៅ Indian Wells និង Miami ដោយសារតែបទប្បញ្ញត្តិការធ្វើដំណើររបស់រដ្ឋាភិបាលសហរដ្ឋអាមេរិកមេរោគ COVID-19 យោងតាមការចេញផ្សាយពីគេហទំព័រជប៉ុនធូដេ។
កីឡាករ Djokovic មិនត្រូវបានចាក់វ៉ាក់សាំង បាននិយាយនៅលើ Twitter ថា ច្បាប់តម្រូវឲ្យពលរដ្ឋមិនមែនជាពលរដ្ឋអាមេរិក ចាក់វ៉ាក់សាំង មុនពេលចូលសហរដ្ឋអាមេរិកបានបង្ខំឲ្យលោកដកខ្លួនចេញ។ កីឡាករស៊ែប៊ី Djokovic បានសរសេរថា ខ្ញុំដឹងថា វាទំនងជាខ្ញុំមិនអាចធ្វើដំណើរបាន ។ CDC (Centers for Disease Control) បានបញ្ជាក់ថា បទប្បញ្ញត្តិនឹងមិនត្រូវបានផ្លាស់ប្តូរ ដូច្នេះខ្ញុំនឹងមិនអាចទៅលេង នៅសហរដ្ឋអាមេរិកបានទេ។ សូមសំណាងល្អចំពោះអ្នក ដែលលេងក្នុងការប្រកួតដ៏អស្ចារ្យទាំងនេះ។
ការចូលរួមរបស់កីឡាករ Djokovic សម្រាប់ការប្រកួតដ៏មានកិត្យានុភាពរបស់សហរដ្ឋអាមេរិកចំនួន២ត្រូវបានគ្របដណ្ដប់ដោយភាពមិនច្បាស់លាស់អស់រយៈពេលជាច្រើនសប្តាហ៍ដោយសារការរឹតបន្តឹងការធ្វើដំណើររបស់សហរដ្ឋអាមេរិក។ ទោះបីជាយ៉ាងណាក៏ដោយ ម្ចាស់ជើងឯក Grand Slam ២0 សម័យកាលវ័យ ៣៤ ឆ្នាំរូបនេះត្រូវបានគេដាក់ឈ្មោះនៅក្នុងការចាប់ឆ្នោតផ្នែកបុរសសម្រាប់ Indian Wells បើទោះបីជាមានការសង្ស័យលើស្ថានភាពរបស់គាត់ក៏ដោយ។
ប្រធានការប្រកួតបាននិយាយថា កីឡាករ Novak Djokovic ស្ថិតនៅក្នុងបញ្ជីឈ្មោះការប្រកួត ដូច្នេះហើយត្រូវបានដាក់ចូលទៅក្នុងការចាប់ឆ្នោតនៅថ្ងៃនេះ។ បច្ចុប្បន្នយើងកំពុងទាក់ទងជាមួយក្រុមរបស់លោក ប៉ុន្តែវាមិនត្រូវបានកំណត់ថា តើលោកនឹងចូលរួមក្នុងព្រឹត្តិការណ៍នេះដោយទទួលបានការយល់ព្រមពី CDC ឲ្យចូលប្រទេសឬអត់។
កីឡាករ Djokovic គឺជាជើងឯក៥សម័យកាលនៅ Indian Wells អ្នករៀបចំបាននិយាយថា ភស្តុតាងនៃការចាក់វ៉ាក់សាំងពេញលេញនឹងត្រូវបានទាមទារសម្រាប់ការចូលទស្សនាកន្លែងប្រកួតនៅវាលខ្សាច់កាលីហ្វ័រញ៉ា៕
ដោយ៖លី ភីលីព
