ភ្នំពេញ៖នាថ្ងៃទី២២ ខែកញ្ញា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជា ក្រោយបញ្ចប់មហាសន្និបាតសហព័ន្ធកីឡាប៊ីយ៉ា និងស្នូកយ័រកម្ពុជា អាណត្តិទី២ ឆ្នាំ២០២២-២០២៦ សហព័ន្ធបន្តធ្វើសន្និសិទកាសែត ស្ដីអំពីការចូលរួមប្រកួតកីឡាស្នូកឃ័រ Asian 6-Red Snooker Championship 2022 នៅប្រទេសម៉ាឡេស៊ីនឹងប្រព្រឹត្តទៅចាប់ពីថ្ងៃទី ២៤ ដល់ថ្ងៃទី ២៩ ខែកញ្ញា ឆ្នាំ២០២២។
ក្នុងឳកាសសន្និសិទកាសែតប្រកាសបញ្ជូន កីឡាករស្នូកឃ័រ២រូបនេះ ដោយមានការអញ្ជើញចូលរួម ពីសំណាក់លោក ម៉ារ៉ា សុជាតិ អគ្គលេខាធិការតំណាងលោក ជុំ កុសល ប្រធានសហព័ន្ធកីឡាប៊ីយ៉ា និងស្នូកឃ័រកម្ពុជា និងរដ្ឋលេខាធិការក្រសួងព័ត៌មាន ព្រមទំាងទីប្រឹក្សាផ្ទាល់ស ម្តេចអគ្គមហាសេនាបតីតេជោ ហ៊ុន សែន និងលោក ALEX LIM ជានាយកនៃនាយកដ្ឋានទំនាក់ទំនងសាជីវកម្ម និងទីផ្សាយធនាគាព្រីនស៍ ម.ក ដែលបានឧបត្ថម្ភដល់សហព័ន្ធ។
លោក ម៉ារ៉ា សុជាតិ បានមានប្រសាសន៍ថា សហព័ន្ធបញ្ជូនកីឡាករស្នូកឃ័រកម្ពុជា ២ រូបចូលរួមការប្រកួតកីឡាស្នូកឃ័រ Asian 6-Red Snooker Championship 2022 នៅប្រទេសម៉ាឡេស៊ី ដោយមានប្រទេសចំនួន ១១ ចូលរួម នៅថ្ងៃដែលនោះក៏មានការប្រកួតកីឡាស្នូកឃ័រជើងឯកពិភពលោកដែរ។ ចំណែកកម្ពុជាបញ្ជូនចូលរួម តែការប្រកួតកីឡាស្នូកឃ័រ Asian 6-Red Snooker Championship 2022ទេ ព្រោះសព្វថ្ងៃនេះកីឡាករ នៅមានកម្រិត ចំណែកកីឡាករស្នូកឃ័រកម្រិតពិភពលោក ពុំទាន់មានឡើយ។
លោកបានបន្តថា ក្នុងនោះយើងបានបញ្ជូន២រូប លើវិញ្ញាសាស្នូកឃ័រកូនក្រហមចំនួន៦ ដែលមានកីឡាករស្នូកឃ័រ ជួង ប៊ុនធឿន និងកីឡាករស្នូកឃ័រ ថាយ តិចហុក ចំពោះកីឡាករស្នូកឃ័រ ដួង ប៊ុនធឿន ជាកីឡាករមួយរូបមានបទពិសោធន៍ ក្នុងការប្រកួតកម្រិតអន្តរជាតិ ព្រមទំាងយល់ដឹងពីស្នូកឃ័រ និងហ្វឹកហាត់បានល្អប្រសើរ ដើម្បីដណ្តើមយកជើងឯកជូនប្រទេសជាតិ ចំណែកកីឡាករស្នូកឃ័រ ថាយ តិចហុក ជាកីឡាករជើងឯក នៃការប្រកួតកីឡាស្នូកឃ័រ King Snooker Cup ។
លោក ALEX LIM ក៏បានមានប្រសាសន៍ថា លោកមានសប្បាយរីករាយណាស់ ដែលចូលរួមជាមួយសហព័ន្ធកីឡាប៊ីយ៉ា និងស្នូកឃ័រកម្ពុជានេះជាផ្នែកតូចមួយក្នុងរួមចំណែកការអភិឌ្ឍន៍វិស័យកីឡានៅប្រទេសកម្ពុជា ពិសេសប្រភេទកីឡាស្នូកឃ័រសម្រាប់ការចូលរួមប្រកួតកីឡាស្នូកឃ័រ Asian 6-Red Snooker Championship 2022 នៅប្រទេសម៉ាឡេស៊ី ហើយចៃនដ្យនោះ គឺលោកជាជនជាតិម៉ាឡេស៊ីទៀត។ លោកសូមអបអរសាទរចំពោះសហព័ន្ធកីឡាប៊ីយ៉ា និងស្នូកឃ័រកម្ពុជាដែលសព្វថ្ងៃនេះដំណ្តើរបានល្អប្រសើរក្រោមការដឹកនាំរបស់លោក ជុំ កុសល ប្រធានសហព័ន្ធកីឡាប៊ីយ៉ា និងស្នូកឃ័រកម្ពុជា និងរដ្ឋលេខាធិការក្រសួងព័ត៌មាន ព្រមទំាងទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន៕ ដោយ៖លី ភីលីព
