ឥណ្ឌូនេស៊ី៖ ប្រធានស្ថាប័នគ្រប់គ្រងបាល់ទាត់ពិភពលោក របស់ FIFA បានចេញលិខិតអង្វរ សម្រាប់បទឈប់បាញ់ ចំពោះសង្គ្រាមនៅអ៊ុយក្រែន ក្នុងរយៈពេលនៃការប្រកួត World Cup ដោយអំពាវនាវឲ្យភាគីទាំងអស់ ប្រើប្រាស់ការប្រកួតជាគន្លឹះវិជ្ជមាន ដើម្បីធ្វើការឆ្ពោះទៅរកដំណោះស្រាយ យោងតាមការចេញផ្សាយ ពីគេហទំព័រជប៉ុនធូដេ។
ថ្លែងក្នុងអំឡុងពេលអាហារថ្ងៃត្រង់ ជាមួយមេដឹកនាំនៃក្រុមប្រទេសសេដ្ឋកិច្ចធំៗ ចំនួន ២០ (G20) នៅលើកោះបាលីរបស់ឥណ្ឌូនេស៊ី ប្រធាន FIFA លោក Gianni Infantino បាននិយាយថា ការប្រកួតបាល់ទាត់ពិភពលោក រយៈពេលមួយខែដែលចាប់ផ្តើម នៅប្រទេសកាតា កាលពីថ្ងៃអាទិត្យបានផ្តល់វេទិកាតែមួយគត់ សម្រាប់សន្តិភាព។ ខ្ញុំសូមអង្វរដល់អ្នកទាំងអស់គ្នា គិតលើបទឈប់បាញ់បណ្តោះអាសន្នមួយខែ សម្រាប់រយៈពេលនៃការប្រកួតបាល់ទាត់ពិភពលោក ឬយ៉ាងហោចណាស់ ការអនុវត្តច្រករបៀងមនុស្សធម៌មួយចំនួន ឬអ្វីដែលអាចនាំទៅរកការបន្តការសន្ទនា ជាជំហានដំបូងដើម្បីសន្តិភាព។
អ្នកគឺជាអ្នកដឹកនាំពិភពលោក អ្នកមានសមត្ថភាពមានឥទ្ធិពល លើដំណើរនៃប្រវត្តិសាស្ត្រ។ បាល់ទាត់ និងការប្រកួតបាល់ទាត់ពិភពលោក កំពុងផ្តល់ឲ្យអ្នក និងពិភពលោកនូវវេទិកាតែមួយគត់ នៃការរួបរួម និងសន្តិភាពនៅទូទាំងពិភពលោក។ ការប្រកួតបាល់ទាត់ពិភពលោក នឹងប្រព្រឹត្តទៅចាប់ពីថ្ងៃទី ២០ ខែវិច្ឆិកាដល់ថ្ងៃទី ១៨ ខែធ្នូ នៅប្រទេសកាតា ជាប្រទេសមជ្ឈិមបូព៌ាដំបូងគេ ដែលរៀបចំព្រឹត្តិការណ៍កីឡាបាល់ទាត់។
រុស្សីបានឡើងដល់វគ្គ៨ក្រុមចុងក្រោយនៃ World Cup ២០១៨ ប៉ុន្តែត្រូវបានរារាំងពីការប្រកួតនេះ ជុំវិញការលុកលុយអ៊ុយក្រែន។ អ៊ុយក្រែន បានខិតមកដល់វគ្គជម្រុះសម្រាប់កាតា ប៉ុន្តែបានចាញ់ក្រុមវេលស៍ ក្នុងការប្រកួតជម្រុះក្នុងខែមិថុនា។ លោក Infantino បានកត់សម្គាល់ថា ប្រទេសរុស្ស៊ីធ្វើជាម្ចាស់ផ្ទះ ឆ្នាំ២០១៨ ហើយអ៊ុយក្រែនកំពុងដេញថ្លៃ ដើម្បីរៀបចំឆ្នាំ ២០៣០ ខណៈមនុស្ស ៥.៥ ពាន់លាននាក់ ត្រូវបានគេរំពឹងថានឹងទស្សនាព្រឹត្តិការណ៍ នៅឆ្នាំនេះអាចផ្តល់សារនៃក្តីសង្ឃឹម។
លោកបានបន្ថែមថា ប្រហែលជាការប្រកួតបាល់ទាត់ពិភពលោកបច្ចុប្បន្ន ដែលចាប់ផ្តើមក្នុងរយៈពេលប្រាំថ្ងៃ អាចជាគន្លឹះវិជ្ជមាននោះ។ នឹងមានក្រុមចំនួន ៣២ ចូលរួមប្រកួតប្រជែង ក្នុងប្រទេសកាតាពីអតីតម្ចាស់ជើងឯក ប្រេស៊ីល អាឡឺម៉ង់ អាហ្សង់ទីន បារាំង និងអេស្បាញ ជប៉ុន សេណេហ្គាល់ កូស្តារីកា និងអារ៉ាប៊ីសាអូឌីត ដែលមានការប្រកួតសរុបចំនួន ៦៤ ៕ ដោយ៖លីភីលីព
