ភ្នំពេញ៖ ក្រុមបាល់ទាត់ស្រលាញ់សន្តិភាព បានឡើងវគ្គ៤ក្រុមចុងក្រោយដោយស្វ័យប្រវត្តិ នៃព្រឹត្តិការណ៍ការប្រកួតកីឡាបាល់ទាត់ ពានរង្វាន់ ៧មករា តេជោសន្តិភាពរដូវកាលទី៧ ឆ្នាំ២០២៣ ដើម្បីអបអរសាទរទិវាជ័យជម្នះ ៧មករា ក្រោមគំនិតផ្តួចផ្តើម ដោយលោក ជុំ កុសល ទីប្រឹក្សាផ្ទាល់ សម្តេចតេជោ ហ៊ុន សែន និងរដ្ឋលេខាធិការ នៃក្រសួងព័ត៌មាន និងប្រធានសម្ព័ន្ធយុវជន ស្រលាញ់សន្តិភាព ។
ក្រុមបាល់ទាត់ស្រលាញ់សន្តិភាព បានយកឈ្នះក្រុមបាល់ទាត់ គួបៃឌីកា លទ្ធផលបច្ចកេទេស ៨ទល់នឹង១ រីឯក្រុមបាល់ទាត់ 7NG Soccer Team បានយកឈ្នះក្រុមបាល់ទាត់វ័យចាស់ទ័ព លទ្ធផលបច្ចកេទេស ៦ទល់នឹង១។ ដូច្នេះពូល “A” ក្រុមបាល់ទាត់ស្រលាញ់សន្តិភាព និងក្រុមបាល់ទាត់ 7NG Soccer Team ដឹកដៃគ្នាឡើងវគ្គ៤ ក្រុមដោយស្វ័យប្រវត្តិ ទោះបីទំាង២ក្រុម នៅសល់មួយប្រកួតក៏ដោយ ខណៈក្រុមបាល់ទាត់ គួបៃឌីកា និងក្រុមបាល់ទាត់វ័យចាស់ទ័ព ធ្លាក់ពីការប្រកួតទោះបីទំាង២ក្រុម នៅសល់មួយប្រកួតក៏ដោយ។
ការប្រកួតគោលបំណង ចូលរួមលើកស្ទួយវិស័យកីឡានៅកម្ពុជា ក៏ដូចជាកៀងគរ នូវមន្ត្រីរាជការ និងបងៗ ពូដែលមានវ័យចំណាស់ នៅគ្រប់វិស័យ ឲ្យចូលរួមលេងកីឡាជាគំរូដ៏ល្អ ដល់យុវជន ឲ្យចូលរួមក្នុងគ្រប់ទម្រង់កីឡា ជាផ្នែកមួយ អាចជួយដល់យុវជនគ្រប់មជ្ឈដ្ឋាន ចេញឆ្ងាយពីអំពើឧបាយមុខ ផ្សេងៗបាន និងពង្រឹងសុខភាព បង្កើតមិត្តភាព ក៏ដូចជាគាំទ្រយ៉ាងមុតមាំ ចំពោះអនុសាសន៍ដ៏ខ្ពង់ខ្ពស់ របស់ប្រមុខរាជរដ្ឋាភិបាលកម្ពុជា ក្នុងការលើកកម្ពស់វិស័យកីឡា ។
ព្រមទាំងពង្រឹងនូវចំណងសាមគ្គីភាព រវាងក្រុមកីឡាករវ័យចំណាស់ នៃស្ថាប័ននានាក្នុងព្រះរាជាណាចក្រកម្ពុជា ឲ្យមានទំនាក់ទំនងកាន់តែប្រសើរ នឹងគ្នាឡើងទ្វេរដង ព្រោះកីឡាជាប្រភពយ៉ាងពិតប្រាកដ នាំមកនូវ “សុខភាព មិត្តភាព សាមគ្គីភាព និងសន្តិ៣ព”ក្រោមម្លប់សន្តិភាពពិតប្រាកដក្នុងសម័យតេជោ ។
ការប្រកួតខាងលើនេះមានក្លិប ចំនួន៨មចែកចេញជា២ពូលគឺពូល “A” ក្រុមបាល់ទាត់ស្រលាញ់សន្តិភាព ក្រុមបាល់ទាត់វ័យចាស់ទ័ព ក្រុមបាល់ទាត់ 7NG Soccer Team និងក្រុមបាល់ទាត់ គួបៃឌីកា ចំណែកពូល “B” ក្រុមបាល់ទាត់មហាហង្សវ័យចាស់ ក្រុមបាល់ទាត់ យុវជន ៧មករា ក្រុមបាល់ទាត់ មិត្តល្អមានជ័យ និងក្រុមបាល់ទាត់អូឡាំពិកវ័យចាស់៕ ដោយ៖លី ភីលីព
