ភ្នំពេញ៖ ការប្រកួតកីឡាគុនល្បុក្កតោជ្រើសរើស ជើងឯកថ្នាក់ជាតិឆ្នាំ២០២២ ក្រុមកីឡាករ-កីឡាការិនីកីឡាគុនល្បុក្កតោក្រសួងមហាផ្ទៃដណ្តើមមេដាយច្រើនជាងគេ គឺមេដាយមាសរហូតដល់ ៥ គ្រឿង ខណៈក្រុមកីឡាករ-កីឡាការិនីកីឡាគុនល្បុក្កតោសុវណ្ណអង្គរនាគរាជខេត្តសៀមរាបមេដាយមាស៤ គ្រឿងតាមពីក្រោយ។
នាថ្ងៃទី៣០ ខែធ្នូ ឆ្នាំ២០២២ លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី ជាប្រធានគណៈកម្មាធិការសិទ្ធិមនុស្សកម្ពុជា និងជាអនុប្រធានសហព័ន្ធកីឡា គុនល្បុក្កតោកម្ពុជាតំណាងឲ្យលោកបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាគុន ល្បុក្កតោកម្ពុជា និងលោក ប៉ែន វុទ្ធី អនុប្រធាននាយកដ្ឋានអប់រំកាយ និងកីឡាទទួលបន្ទុករួមបានអញ្ជើញ ចូលរួមពិធីបិទការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិឆ្នាំ២០២២ នៅសាកលវិទ្យាល័យភូមិន្ទភ្នំពេញ។
លោក អ៊ូ តារា អគ្គលេខាធិការរងសហព័ន្ធកីឡា គុនល្បុក្កតោកម្ពុជាបានប្រាប់ឲ្យដឹងថា សហព័ន្ធកីឡាគុនល្បុក្កតោម្ពុជាមានកិត្តិយសយ៉ាងធំធេង បានរៀបចំការប្រកួតកីឡាគុនល្បុក្កតោ ជ្រើសរើសជើងឯកថ្នាក់ជាតិឆ្នាំ២០២២ ដែលជាការរប្រកួតធំប្រចាំឆ្នាំ។ក្រោមការចង្អុលបង្ហាញ ពីលោកបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាគុន ល្បុក្កតោកម្ពុជា ដើម្បីឲ្យការប្រកួតដំណើការដោយរលូន និងទទួលបានជោគជ័យ ។គណៈកម្មការរៀបចំការប្រកួត បានរៀបចំ ទទួលបន្ទុកការធ្វើដំណើរ ហូបចុក ស្នាក់នៅរបស់ ព្រឹទ្ធាចារ្យគ្រូ បង្វឹក អាជ្ញាកណ្ដាល ចៅក្រម និងកីឡាករ កីឡាការិនី ដែលមកពីតាមបណ្តាខេត្តឆ្ងាយ ដោយក្នុងនោះមក ២៥ សាលាគុនដែលមកពី ១០ពីរាជធានី-ខេត្ត និង ក្រសួង១ ដោយមាន ប្រតិភូគ្រូបង្វឹក ៤៣រូប កីឡាករ១០២រូប កីឡាការិនី៦៨រូប គណៈកម្មការរៀបចំការប្រកួត ៤៨រូប និងក្រុមការងារស្ម័គ្រចិត្ត ២០រូប សរុប ២៨១រូប ។
លោកបានបន្ថែមថា សម្រាប់ការរៀបចំទីលានការប្រកួតឲ្យបានត្រឹមត្រូវតាម បទដ្ឋានបច្ចេកទេស ដើម្បីសម្រួចទៅដល់ការរៀបចំការប្រកួតក្នុងព្រឹត្តិការណ៍ SEA GAMES ឆ្នាំ២០២៣ដែលប្រភេទកម្ពុជា ធ្វើជាម្ចាស់ផ្ទះក៏ត្រូវបានការយកចិត្តទុកដាក់ពីថ្នាក់ដឹកនាំសហព័ន្ធផងដែរ។ ដើម្បីត្រៀមលក្ខណៈសម្បត្តិឆ្ពោះទៅឆ្នាំ២០២៣ សម្រាប់ការរៀបចំការប្រកួតកីឡា SEA GAMES លើកទី៣២ ក្នុងនោះក៏មិនអាចខ្វះបាន ពីការចូលរួមតាំងចិត្តរបស់បុគ្គលម្នាក់ៗ ដើម្បីសម្រេចគោលដៅរួមគ្នា ក្នុងការជម្រុញឲ្យគុនល្បុក្កតោកាន់ភាពល្បីល្បាញ ទាំងក្នុងស្រុក និងក្រៅស្រុកឲ្យសាក សមជាអ្នកបន្តវេនដ៍វឆ្លាតរបស់បុព្វបុរសខ្មែរយើង។
ក្រុមកីឡាគុនល្បុក្កតោក្រសួងមហាផ្ទៃ ដណ្តើមមេដាយមាស ៥ គ្រឿង ប្រាក់ ២ គ្រឿង និងសំរិទ្ធ៤ គ្រឿង ខណៈក្រុមកីឡាគុនល្បុក្កតោសុវណ្ណអង្គរនាគរាជ ខេត្តសៀមរាបឈ្នះមេដាយមាស ៤ គ្រឿង និងប្រាក់ ២ គ្រឿង ក្រុមកីឡាគុនល្បុក្កតោខេត្តតាកែវ (គោកធ្លក) ឈ្នះមេដាយមាស ៣ គ្រឿង ប្រាក់ ៣ គ្រឿង និងសំរិទ្ធ ២ គ្រឿង និងក្រុមកីឡាគុនល្បុក្កតោខេត្តតាកែវ ឈ្នះមេដាយមាស ២ គ្រឿង ប្រាក់ ២ គ្រឿង និងសំរិទ្ធ ១ គ្រឿង ។
ចំណែកក្រុមកីឡាគុនល្បុក្កតោអង្គរ មានឬិទ្ធិ៍ឈ្នះមេដាយមាស ២ គ្រឿង ប្រាក់ ១ គ្រឿង និងសំរិទ្ធ ២ គ្រឿង ក្រុមកីឡាគុនល្បុក្កតោខេត្តកំពង់ឆ្នាំងឈ្នះមេដាយមាស ២ គ្រឿង និងសំរិទ្ធ ៣ គ្រឿងក្រុមកីឡាគុនល្បុក្កតោខេត្តរតនាគិរី ឈ្នះមេដាយមាស ១ គ្រឿង ប្រាក់ ៣ គ្រឿង និងសំរិទ្ធ ២ គ្រឿង ក្រុមកីឡាគុនល្បុក្កតោខេត្តកងពលតូចថ្មើរជើងលេខ៥១ ឈ្នះមេដាយមាស ១ គ្រឿង និងប្រាក់ ១ គ្រឿង និងក្រុមកីឡាគុនល្បុក្កតោដំរីសឈ្នះមេដាយមាស ១ គ្រឿង និងសំរិទ្ធ ១ គ្រឿង៕
ដោយ៖លី ភីលីព
