GENEVA ៖ យោងតាមការចេញផ្សាយ ពីគេហទំព័រជប៉ុនធូដេ បានប្រាប់ឲ្យដឹងថា ការរិះគន់ដោយ រដ្ឋាភិបាលអ៊ឺរ៉ុប ចំពោះការគាំទ្រ ការបញ្ចូលអត្តពលិក រុស្ស៊ី និងបេឡារុស្ស ឲ្យចូលរួមព្រឹត្តិការណ៍ កីឡាពិភពលោក មុនការប្រកួតកីឡាប៉ារីសឆ្នាំ ២០២៤ ត្រូវបានគេហៅថា គួរឲ្យសោកស្តាយ ដោយមេដឹកនាំគណៈកម្មាធិការ អូឡាំពិក អន្តរជាតិ កាលពីថ្ងៃព្រហស្បតិ៍ ។
ប្រធាន IOC លោក Thomas Bach ក៏បានស្នើរដ្ឋាភិបាលទាំងនោះ ហាក់ដូចជារួមបញ្ចូលប្រទេស កំណើតរបស់លោក គឺប្រទេសអាល្លឺម៉ង់ មានស្តង់ដារទ្វេរដង សម្រាប់ផ្តោតលើអត្តពលិក មកពីប្រទេស ពាក់ព័ន្ធក្នុងសង្រ្គាម ប្រហែល ៧០ និង ជម្លោះប្រដាប់អាវុធ ដែលកំពុងបន្តនៅលើពិភពលោក ។
លោក Bach បានរៀបរាប់លម្អិត ពីការណែនាំរបស់ IOC កាលពីថ្ងៃអង្គារដល់ស្ថាប័ន កីឡាអូឡាំពិកនីមួយៗ នៃលក្ខខណ្ឌដែលពួកគេអាចសម្រេចចិត្ត អនុម័តបុគ្គលរុស្ស៊ី ឬបេឡារុស្ស ឲ្យប្រកួតប្រជែងក្នុងនាម ជាអត្តពលិកអព្យាក្រឹត ខណៈបន្តការហាមឃាត់កីឡាជាក្រុម ។ IOC បាននិយាយថា កីឡាគួរតែមិនរាប់បញ្ចូល អត្តពលិកមានទំនាក់ទំនងយោធា ទោះបីជាលោក Bach បានបញ្ជាក់កាលពីថ្ងៃព្រហស្បតិ៍ថា នេះទំនងជាមិនគួរអនុវត្ត ចំពោះអ្នកដែលបំពេញកាតព្វកិច្ច រយៈពេលមួយឆ្នាំក៏ដោយ ។
លោក Bach បាននិយាយក្នុងសន្និសីទសារព័ត៌មាន បន្ទាប់ពីកិច្ចប្រជុំក្រុមប្រឹក្សា ប្រតិបត្តិ IOC ថា យើងបានកត់សម្គាល់ ប្រតិកម្មអវិជ្ជមានមួយ ចំនួនដោយរដ្ឋាភិបាលអឺរ៉ុប មួយចំនួនជាពិសេស ។ ចំណែករដ្ឋមន្ត្រីកីឡាអាល្លឺម៉ង់ លោក Nancy Faeser បាននិយាយកាលពីថ្ងៃអង្គារថា ការផ្លាស់ប្តូររបស់ IOC ពីតំណែងរបស់ខ្លួនកាលពីមួយឆ្នាំមុន ដើម្បីដកអត្តពលិក និងក្រុមទាំងអស់ មកពីប្រទេសរុស្ស៊ី និងបេឡារុស្ស ជាការទះកំផ្លៀង ចំពោះអត្តពលិកអ៊ុយក្រែន ។
លោក Faeser បានបន្តថា អ្នកដែលធ្វើឲ្យរុស្ស៊ីក្តៅជាងនេះ ប្រើប្រាស់ការប្រកួតប្រជែង អន្តរជាតិសម្រាប់ការឃោសនា របស់ខ្លួនកំពុងធ្វើឲ្យខូចដល់គំនិត អូឡាំពិកនៃសន្តិភាព និង ការយល់ដឹងអន្តរជាតិ ដោយបានបន្លឺឡើង នូវមតិយោបល់ពីមុនរបស់ប្រធានាធិបតី អ៊ុយក្រែន Volodymyr Zelenskyy និងសម្ព័ន្ធមិត្តរួមទាំង ប្រទេសប៉ូឡូញ ។
ក្រសួងការបរទេសអ៊ុយក្រែន បាននិយាយកាលពីថ្ងៃព្រហស្បតិ៍ថា IOC ជៀសវាងប្រធានបទនៃឧក្រិដ្ឋកម្មសង្គ្រាម (រុស្ស៊ី) និងបង្ហាញភាពល្ងង់ខ្លៅ ដោយចេតនានៃការពិតសង្គ្រាម ។ លោក Bach បានឆ្លើយតបថា វាជាការគួរឲ្យសោកស្តាយ ដែលរដ្ឋាភិបាលមួយចំនួនមិនចង់គោរព ភាគច្រើននៅក្នុងចលនាអូឡាំពិក និងអ្នកពាក់ព័ន្ធទាំងអស់ ឬស្វ័យភាព នៃកីឡាដែលពួកគេកំពុងសរសើរ និងស្នើសុំពីប្រទេសផ្សេងទៀត ៕
