ភ្នំពេញ៖ក្រុមបាល់ទាត់យុវជន សង្កាត់បឹងទំពន់២ ដណ្តើមបានពាន់រង្វាន់នៃការប្រកួតពានរង្វាន់របស់រដ្ឋបាលខណ្ឌមានជ័យ លើកទី១ ឆ្នាំ២០២៣ បន្ទាប់ពីក្រុមនេះបានយកឈ្នះក្រុមបាល់ទាត់យុវជន រាជសីហ៍ចាក់អង្រែក្រោមក្នុងលទ្ធផលបច្ចេកទេស ៤ ទល់នឹង ៣ នៅវគ្គផ្តាច់ព្រ័ត្រនាទីលានបាល់ទាត់ ISPP។
ក្នុងឱកាសពិធីបិទការប្រកួតពានរង្វាន់ របស់រដ្ឋបាលខណ្ឌមានជ័យ លើកទី១ ឆ្នាំ២០២៣ នាថ្ងៃទី៩ ខែមេសា ឆ្នាំ២០២៣ ដោយមានការអញ្ជើញចូលរួមពីសំណាក់លោក នួន ផារ័ត្ន អភិបាលរងរាជធានីភ្នំពេញ លោក ហែម ដារិទ្ធ អភិបាលខណ្ឌមានជ័យ និងអភិបាលរងខណ្ឌមានជ័យ ចៅសង្កាត់ទៀតផង។
លោក ហែម ដារិទ្ធ បានមានប្រសាសន៍ថា ព្រឹត្តិការណ៍បាល់ទាត់នេះ ធ្វើឡើងក្នុងគោលបំណងលើកស្ទួយ វិស័យកីឡានៅខណ្ឌមានជ័យឲ្យមានការរីកចម្រើន កាន់តែខ្លាំងឡើង និងដើម្បីឲ្យយុវជន និងបងប្អូនយើងទាំងអស់ ដែលស្រឡាញ់វិស័យកីឡាចូលរួម ប្រកួតឲ្យបានផុលផុស ព្រមទំាងបង្កើនទឹកចិត្ត យុវជនរបស់យើង ចូលរួមលេងកីឡាដើម្បីសុខភាព បង្កើនមិត្តភាព ជៀសឆ្ងាយពីគ្រឿងញៀន ។
លោកអភិបាលបានបន្តថា ប្រកួតត្រូវប្រកាន់ខ្ជាប់ នូវក្រមសីលធម៌ខ្ពស់ មានសាមគ្គីភាព ត្រូវតាំងចិត្តជាអ្នកកីឡា ដោយហ៊ានទទួលយកលទ្ធផល ទោះបីចាញ់ឈ្នះក៏ដោយ ហើយរាល់ការប្រកួត ក្រុមទាំងអស់ត្រូវបញ្ចេញ ឲ្យអស់ពីសមត្ថភាពបច្ចេកទេស ដើម្បីផ្ដល់ជាការសប្បាយរីករាយ និងចំណីចក្ខុដល់អ្នកមកទស្សនាផ្ទាល់។
លោក នួន ផារ័ត្នក៏បានមានប្រសាសន៍ថា ព្រឹត្តិការណ៍កីឡានេះក៏បានរួមចំណែកដល់ការបង្កើនមូលធនសង្គម និងការសម្រេចបាន សុខដុមនីយកម្មក្នុងសង្គមជាតិ ស្របពេលប្រទេសកម្ពុជាយើង ត្រៀមឆ្ពោះទៅកាន់ព្រឹត្តិការណ៍ ជាប្រវត្តិសាស្ត្រថ្មីមួយទៀត ដែលទង់ជាតិកម្ពុជានឹងអណ្តែត ឡើងប្រកបដោយមោទកភាព ក្នុងនាមជាប្រជាជាតិ មានអរិយធម៌ វប្បធម៌ ដ៏ល្បីរន្ទឺ និងចំណាស់មួយក្នុងសកលលោក នៅសល់តែ២៥ថ្ងៃទៀតប៉ុណ្ណោះ កម្ពុជានឹងធ្វើជាម្ចាស់ផ្ទះរៀបចំការប្រកួតកីឡា SEA Games និងអាស៊ានប៉ារ៉ាហ្គេម (ASEAN Para Games) ជាការប្រកួតកម្រិតអន្តរជាតិដ៏ធំ នៅកម្ពុជា ហើយនេះគឺជាកិត្តិយសជាប្រវត្តិសាស្ត្រមួយទៀត ក្នុងវិស័យកីឡា ដែលកម្ពុជារង់ចាំធ្វើជាម្ចាស់ផ្ទះអស់រយៈពេល ៦៤ ឆ្នាំមកហើយ៕ដោយ៖លី ភីលីព
