ភ្នំពេញ ៖ ក្រុមបាល់ទាត់វ័យចាស់ចំនួន ៣ ក្រុមបានណាត់ជួបគ្នា រៀបចំការប្រកួតពានមិត្តភាព វ័យចាស់ Home Sports ឆ្នាំ២០២៣ កាលពីថ្ងៃអាទិត្យទី៣០ ខែកក្កដា ឆ្នាំ២០២៣ នៅទីលានហ្វឹកហាត់ ក្រុមជម្រើសជាតិមរតកតេជោ ក្នុងពហុកីឡដ្ឋាន ជាតិមរតកតេជោ ក្រោមគំនិតផ្តួចផ្តើម ដោយលោក ជុំ កុសល ទីប្រឹក្សាផ្ទាល់ សម្តេចតេជោ ហ៊ុន សែន និងរដ្ឋលេខាធិការ នៃក្រសួងព័ត៌មាន និងប្រធានសម្ព័ន្ធយុវជនស្រលាញ់សន្តិភាព ក្រោមការសហការឧបត្ថម្ភពីហាង Home Sports ។
ការប្រកួតពានមិត្តភាព វ័យចាស់ Home Sports ឆ្នាំ២០២៣ មាន ៣ ក្រុម គឺក្រុមបាល់ទាត់វ័យចាស់ស្រលាញ់សន្តិភាព ក្រុមបាល់ទាត់វ័យចាស់ កម្ពុជា-អាស៊ាន និងក្រុមបាល់ទាត់វ័យចាស់ឥន្ទ្រី ។ សម្រាប់កីឡាករ ដែលមានសិទ្ធិចូល រួមត្រូវមានអាយុចាប់ពី ៣៥ ឆ្នាំឡើងទើបប្រកួតបាន ។
លោក ហេង រស្មី ម្ចាស់ហាង Home Sports បានមានប្រសាសន៍ថា ការប្រកួតធ្វើឡើង ក្នុងគោលបំណងចូលរួម លើកស្ទួយវិស័យកីឡានៅកម្ពុជា ក៏ដូចជាកៀងគរ នូវមន្ត្រីរាជការ និងបងៗ ពូដែលមានវ័យចំណាស់ នៅគ្រប់វិស័យ ឲ្យចូលរួមលេងកីឡា ជាគំរូដ៏ល្អ ដល់យុវជន ឲ្យចូលរួមក្នុង គ្រប់ទម្រង់កីឡា ជាផ្នែកមួយ អាចជួយដល់យុវជន គ្រប់មជ្ឈដ្ឋាន ចេញឆ្ងាយពីអំពើឧបាយមុខ ផ្សេងៗបាន និងពង្រឹងសុខភាព បង្កើតមិត្តភាព ក៏ដូចជាគាំទ្រយ៉ាងមុតមាំ ចំពោះអនុសាសន៍ដ៏ខ្ពង់ខ្ពស់ របស់ប្រមុខរាជរដ្ឋាភិបាលកម្ពុជា ក្នុងការលើកកម្ពស់វិស័យកីឡា ។
ព្រមទាំងពង្រឹងនូវចំណងសាមគ្គីភាព រវាងក្រុមកីឡាករវ័យចំណាស់ នៃស្ថាប័ននានា ក្នុង ព្រះរាជាណាចក្រកម្ពុជា ឲ្យមានទំនាក់ទំនងកាន់តែប្រសើរ នឹងគ្នាឡើងទ្វេរដង ព្រោះកីឡា ជាប្រភពយ៉ាងពិតប្រាកដ នាំមកនូវ “សុខភាព មិត្តភាព សាមគ្គីភាព និងសន្តិ៣ព” ក្រោមម្លប់សន្តិភាពពិត ប្រាកដក្នុងសម័យតេជោ ៕
