ភ្នំពេញ៖ កីឡាករ ឆេង ច័ន្ទដារ៉ារតនៈ អតីតសិស្សសាលាគុនសុរិយា ការ៉ាតេ-ដូក្នុងចំណោមក្រុមកីឡាករ-កីឡាការិនីការ៉ាតេក្រសួងមហាផ្ទៃដណ្តើមបានមេដាយ ៣ គ្រឿងចំណោមមេដាយសរុបចំនួន៨គ្រឿង ក្នុងនោះមេដាយមាស ៣ គ្រឿង ប្រាក់ ៣ គ្រឿង និងសំរឹទ្ធ ២គ្រឿងក្នុងព្រឹត្តិការណ៍ការប្រកួតកីឡានគរបាល និងកងពន្លត់អគ្គិភ័យពិភពលោក លើកទី២០ ឆ្នាំ២០២៣ (the 20th World Police & Fire Games 2023) នៅទីក្រុង Winnipeg ប្រទេសកាណាដា។
ចំពោះកីឡាករ ឆេង ច័ន្ទដារ៉ារតនៈ ដណ្តើមមេដាយមាស ១ គ្រឿង វិញ្ញាសាប្រយុទ្ធឯកត្តជនបុរស អាយុ១៨ឡើង ប្រភេទទម្ងន់ក្រោម ៧០ គីឡូក្រាម មេដាយប្រាក់ ១ គ្រឿង វិញ្ញាសាសម្ដែងឯកត្តជនបុរសអាយុ ១៨ ឆ្នាំឡើង មេដាយសំរឹទ្ធ ១ គ្រឿង វិញ្ញាសាប្រយុទ្ធក្រុមបុរស អាយុ១៨ឆ្នាំឡើង។
កីឡាការិនី ស៊ឹម ស្រីនីន ឈ្នះមេដាយមាស ១ គ្រឿង វិញ្ញាសាសម្ដែងឯកត្តជននារី អាយុ១៨ឆ្នាំឡើង មេដាយសំរឹទ្ធិ ១គ្រឿង វិញ្ញាសាប្រយុទ្ធក្រុមនារី អាយុ១៨ឆ្នាំឡើង រីឯកីឡាការិនី ផុន គិមស្រៀង មេដាយប្រាក់ ១ គ្រឿង វិញ្ញាសាប្រយុទ្ធឯកត្តជននារី ប្រភេទទម្ងន់ក្រោម៥៥គីឡូក្រាម និងមេដាយសំរឹទ្ធិ ០១គ្រឿង វិញ្ញាសាប្រយុទ្ធក្រុមនារី អាយុ១៨ឆ្នាំឡើង ចំណែកកីឡាករ តក់ ពិចិត្រ ឈ្នះមេដាយប្រាក់ ១ គ្រឿង វិញ្ញាសាប្រយុទ្ធឯកត្តជនបុរស អាយុ១៨ឆ្នាំឡើង ប្រភេទទម្ងន់ក្រោម៧៥គីឡូក្រាម និងមេដាយសំរឹទ្ធិ ១គ្រឿង វិញ្ញាសាប្រយុទ្ធក្រុមបុរស អាយុ១៨ឆ្នាំឡើង ចំពោះកីឡាករ កាក់ សីលាបញ្ញាឈ្នះមេដាយមាស ១ គ្រឿង វិញ្ញាសាប្រយុទ្ធឯកត្តជនបុរស អាយុ១៨ឆ្នាំឡើង ប្រភេទទម្ងន់៨៥គីឡាក្រាមឡើង និងមេដាយសំរឹទ្ធិ ១គ្រឿង វិញ្ញាសាប្រយុទ្ធក្រុមបុរស អាយុ១៨ឆ្នាំឡើង.
ប្រតិភូកីឡាក្រសួងមហាផ្ទៃចំនួន ៤៨ នាក់បានធ្វើដំណើរទៅប្រទេសកាណាដា ដើម្បីចូលរួមព្រឹត្តិការណ៍កីឡាកម្រិតពិភពលោក ចាប់ផ្ដើមពីថ្ងៃទី២៨ ខែកក្កដា រហូតដល់ថ្ងៃទី៦ ខែសីហា ឆ្នាំ២០២៣ ដើម្បីចូលរួមបង្ហាញពីសាមគ្គីភាព សមត្ថភាព និងទេព្យកោសល្យរបស់កងនគរបាលនៃប្រទេសនីមួយៗ ក្នុងចំណោមប្រទេសជាង៧០ដែលតែងតែបញ្ជូនប្រតិភូកីឡាករ កីឡាការិនីមកចូលរួម ខណៈកម្ពុជាបានចូលរួម២លើករួចមកហើយ។
កីឡាករ-កីឡាការិនីកម្ពុជាកំពុងចូលរួមក្នុងព្រឹត្តិការន៍នេះ ប្រកួតលើ១៣ប្រភេទកីឡា រួមមានកីឡាវាយសី, កីឡាលើកទំងន់, កីឡាយូដូ, កីឡាជីជិតស៊ូ, កីឡាការ៉ាតេ, កីឡាហែលទឹក, កីឡាវាយកូនឃ្លីលើតុ, កីឡាបាល់ទះក្នុងសាល, កីឡាបាល់ទះឆ្នេរខ្សាច់, កីឡាចំបាប់, កីឡាចំបាច់កាច់ដៃ, កីឡាវាយកូនគោល, កីឡា Bench Press និងកីឡា Push Pull Lifting៕ ដោយ៖លី ភីលីព
