ខ្សែបម្រើ Alex Oxlade-Chamberlian បានចាកចេញពី Liverpool ហើយទៅចូលរួមជាមួយក្លឹបតួកគី Besiktas។
យោងតាមការចុះផ្សាយរបស់ Fabrizio Romano កីឡាករអង់គ្លេសOxlade-Chamberlian នឹងចូលរួមជាមួយក្លឹបតួកគី ក្នុងកុងត្រាមួយដែលមានរយៈពេល ៣ ឆ្នាំ។ ការណ៍នេះ បានកើតឡើងក្រោយ Oxlade-Chamberlian បានផុតកុងត្រាជាមួយហង្សក្រហម Liverpool។
ខ្សែបម្រើវ័យ ២៩ ឆ្នាំ Oxlade-Chamberlian បានមកចូលរួមជាមួយ Liverpool កាលពីខែសីហា ឆ្នាំ ២០១៧ ពីក្លឹប Arsenal ។ កីឡាករបានបន្តនៅជាមួយហង្សក្រហម រហូតដល់ឆ្នាំ ២០២៣ មុននឹងមកចូលរួមជាមួយ Besiktas។ ក្នុងអំឡុងពេលនោះ ខ្សែបម្រើលេងសរុប ១៤៦ ប្រកួត និងស៊ុតចូល ១៨ គ្រាប់ឲ្យ Liverpool ។ កាលពីលេងឲ្យហង្សក្រហម កីឡាករត្រូវបានគេមើលឃើញបានបង្ហាញទម្រង់ល្អ ក្នុងប្រកួតមួយចំនួន ។ ទោះជាយ៉ាងណា បញ្ហារបួសធ្វើឲ្យកីឡាករអង់គ្លេស អាក់ខាន ជាច្រើនប្រកួតក្នុងការជួយក្លឹប រហូតដល់បាត់តួនាទីស្នូលក្នុងក្រុម៕
