អតីតអ្នកប្រដាល់ល្បីឈ្មោះ និងមានប្រជាប្រិយនៅកម្ពុជា លោក នួន សូរិយា ថារយៈពេល ២ឆ្នាំកីឡាករ ពេជ្រ សម្បត្តិ ប្រកួតបានប៉ុណ្ណេះ និងល្បីដូចនេះអនាគតអាចនឹងខ្លាំងជាងអ្នកលេងគុនថៃ រថថាំង (Rodtang) ទៅទៀត។
សម្បត្តិ (ឆ្វេង) និង រថថាំងនេះបើតាមការឡាយវីដេអូលើហ្វេសបុករបស់លោក នួន សូរិយា គឺបានលើកឡើងថា រយៈពេលត្រឹម ២ឆ្នាំ កីឡាករ ពេជ្រ សម្បត្តិ ប្រកួតបានល្អ និងល្បីឈ្មោះបែបនេះមិនមែនជារឿងធម្មតានោះឡើយ។ ប្រសិនបើបន្តខំប្រឹងហ្វឹកហាត់ និងថែទាំខ្លួនបានល្អនោះអនាគតអាចនឹងខ្លាំងជាងអ្នកលេងគុនថៃ រថថាំង (Rodtang) ទៅទៀត។ ព្រោះថាកីឡាករថៃម្នាក់នេះគឺរូបគេប្រឡូកក៏ដូចជាចូលប្រកួតតាំងពីវ័យក្មេងៗមកម្ល៉េះទម្រាំខ្លាំង ឬល្អមានកេរ្តិ៍ឈ្មោះដូចសព្វថ្ងៃ។
បញ្ជាក់ដែរថា ពេជ្រ សម្បត្តិ ជាកីឡាករម្នាក់កំពុងល្បីឈ្មោះនៅកម្ពុជានាពេលបច្ចុប្បន្ននេះ។ រូបគេចាត់ចូលជាកីឡាករលំដាប់ A ហើយ។ អ្នកលេងគុនខ្មែររូបនេះជាកូនសិស្សលោក ពេជ្រ សុផាន់។ ចូលប្រឡូកគុនខ្មែររយៈពេលប្រហែល២ឆ្នាំនេះ សម្បត្តិ ឈ្នះខ្សែក្រវាត់២គ្រឿងគឺខ្សែក្រវាត់ខារ៉ាបាវ នៅសង្វៀនបាយ័ន និងខ្សែក្រវាត់គ្រុទ នៅសង្វៀន ទទក។ ថ្មីៗនេះរូបគេទើបឈ្នះបានឡានមួយគ្រឿងផងដែរក្នុងកម្មវិធីគុនខ្មែរអលស្តារបន្ទាប់ពីអ្នកគាំទ្រផ្ញើសារឲ្យរូបគេបានច្រើនជាងគេ៕
សម្បត្តិ (រូបភាពហ្វេសបុក លោក ពេជ្រ សុផាន់)
ប្រភពsabay
