ក្រុមបាល់ទាត់ តួកគី បានយកឈ្នះក្រុមជម្រើសជាតិ ឆែក ដោយលទ្ធផល២-១ កាលពីថ្ងៃទី២៦ ឈានចូលថ្ងៃទី២៧ ខែមិថុនា ឆ្នាំ២០២៤ សម្រាប់ការប្រកួតសន្សំពិន្ទុក្នុងពូល F ហើយជំនួបនោះអាជ្ញាកណ្ដាលលោក Istvan Kovács សញ្ជាតិរ៉ូម៉ានីបានចាយកាតលើកីឡាករ១៨នាក់ ដែលត្រូវបានគេចាត់ទុកថាជាប្រវត្តិសាស្ត្រថ្មីមួយក្នុងពានរង្វាន់ EURO ដែលមិនធ្លាប់មានពីមុនមក ។
កីឡាករទាំង១៨នាក់មាន ពីរនាក់ទទួលបានកាតក្រហម ក្នុងនោះទទួលបានកាតលឿងពីរដងស្មើកាតក្រហម១ គឺធ្លាក់ទៅលើកីឡាករ A. Barák ដោយកាតលឿងទាំងពីរទទួលបាននៅនាទីទី១១ និងនាទីទី២០ ។ ស្របពេលកាតក្រហមទី២ ក៏បានទៅលើកីឡាករឆែកដដែល គឺធ្លាក់ទៅលើខ្សែប្រយុទ្ធT. Chorý នាទីទី៩០+៨។ ក្រៅពីនោះគឺកាតលឿងចំនួន៥បានទៅកីឡាកររបស់ ឆែក ៥នាក់ផ្សេងទៀត ។
ខណៈដែលកីឡាកររបស់ តួកគី វិញគឺទទួលបានកាតលឿងចំនួន១១នាក់តែម្ដង ក្នុងនោះមានកីឡាករដែលប្ដូរចូលចំនួន ៣ នាក់និងកីឡាករ៨នាក់នៅលើទីលាន។ ជ័យជម្នះរបស់ តួកគី ២-១ លើឆែកនេះបានជួយឲ្យពូកគេបានឡើងទៅកាន់វគ្គ១៦ក្រុមចុងក្រោយ នៃព្រឹត្តិការណ៍ EURO 2024 ជាមួយក្រុមពីរផ្សេងទៀតដែលស្ថិតនៅពូល F ជាមួយគ្នាដោយ ព័រទុយហ្គាល់ លេខ ១ ហើយតួកគី ខ្លួនឯងបានលេខ២ និង ហ្សកហ្ស៊ី ទទួលបានលេខ៣ល្អផងដែរ៕
