លោក Javier Mascherano គ្រូបង្វឹករបស់ក្រុមបាល់ទាត់ជម្រើសជាតិ អាហ្សង់ទីនក្រោមអាយុ២៣ឆ្នាំ បាននិយាយពីការប្រកួតរវាងក្រុមលោក ទល់ក្រុមបាល់ទាត់ជម្រើសជាតិ ក្រោមអាយុ២៣ឆ្នាំម៉ារ៉ុក វាហាក់ដូចជារឿងកំប្លែង បន្ទាប់ពីមានការដកគ្រាប់បាល់ របស់ខាងអាហ្សង់ទីនចេញមកឲ្យចាញ់២-១ វិញ ។
ការប្រកួតរវាងក្រុមទាំងពីរ បានបន្ថែមម៉ោងចំនួន ១៥ នាទីហើយនៅម៉ោងបន្ថែមនាវិនាទីចុងក្រោយអាហ្សង់ទីនបានតាមស្មើ២-២ ទៅហើយ ពេលនោះហ្វូងមនុស្សអ្នកគាំទ្របានរត់ចូលទីលាន ដែលភាគច្រើននៃហ្វូងមនុស្សនោះត្រូវបានគេមើលឃើញថា សុទ្ធសឹងតែជាអ្នកគាំទ្ររបស់ម៉ារ៉ុក។ បន្ទាប់ពីការប្រកួតពន្យារពេល និងពិនិត្យឡើងវិញ គ្រាប់បាល់ចុងក្រោយនោះស្ថិតក្នុងជំហរ Offside ដែលធ្វើឲ្យអាជ្ញាកណ្ដាលបានសម្រេចចិត្តដកគ្រាប់បាល់ចុងម៉ោងនោះចេញ ហើយក៏បន្តការប្រកួត៣នាទីចុងក្រោយ។ លុះបញ្ចប់ក៏សម្រេចថា ក្រុមអាហ្សង់ទីនចាញ់ម៉ារ៉ុក ២-១។
ក្រោយការប្រកួតគ្រូបង្វឹករបស់អាហ្សង់ទីនលោក Javier Mascherano បាននិយាយថា «បើគិតទៅខ្ញុំធ្វើគ្រូនេះមិនយូរប៉ុន្មានទេ ប៉ុន្តែខ្ញុំក៏មិនដែលឃើញស្ថានភាពបែបនេះដែរក្នុងអាជីពរបស់ខ្ញុំកាលខ្ញុំនៅជាកីឡាករនោះ។ វាមើលទៅដូចជាថ្លុកកំប្លែង ហើយមិនដឹងថា ហេតុអីបានត្រូវដកគ្រាប់បាល់ វាជារឿងដ៏ហួសចិត្ត។ យើងគ្មានជម្រើសទេ…តែយ៉ាងណាខ្ញុំបានប្រាប់ទៅកូនក្រុមខ្ញុំហើយយើងសំឡឹងរក៦ពិន្ទុនៅសល់ ដើម្បីធ្វើយ៉ាងណានៅតែអាចបន្តទៅវគ្គបន្ត»។
គ្រូបង្វឹកដដែលបន្ថែមថា ដំបូងយើងគិតថាមិនចង់លេងបន្តទេ ប៉ុន្តែអ្នករៀបចំបានកោះហៅឲ្យចូលប្រកួត។ វាជាការប្រកួតមួយដ៏អាម៉ាស់ ដែលមើលទៅហាក់ដូចជាលេងតាមភូមិ-ឃុំយ៉ាងម៉េចមិនដឹងទេ៕
