អ្នកចាត់ការរបស់មេឃខៀវ Manchester City លោក Pep Guardiolaបាននិយាយថា «…ខ្ញុំទើបតែបានអានព័ត៌មានពីការដាក់ពិន័យរបស់ English Premier League ដូច្នេះខ្ញុំគួរតែព្យាយាមនិយាយឲ្យបានខ្លីជាងរាល់ដង»។ ការលើកឡើងនេះធ្វើឡើងនៅទឹកដីអាមេរិកក្នុងការប្រកួតមិត្តភាពទល់ Chelsea កន្លងទៅ។
Manchester City ត្រូវបានពិន័យជាប្រាក់ចំនួន ២,០៩ លានអឺរ៉ូ ពីបទមិនគោរពពេលវេលាប្រកួតពោលគឺកែបាល់ និងចេញមកចាប់ផ្ដើមការប្រកួតនៅវគ្គទី២យឺត ដែលមានចំនួនសរុបប្រមាណ២២លើក។ កន្លងមកក្លឹបបាល់ទាត់ Manchester City បានទទួលយកកំហុសថា ពួកគេពិតជាបានចាប់ផ្ដើមការប្រកួតយឺតមែន ហើយក្លឹបក៏បានសម្ដែងការសុំទោសផងដែរលើចំណុចនេះ។
បើតាមលើរបាយការណ៍ការប្រកួតកាលពីរដូវកាល២០២២-២០២៣ មេឃខៀវ បានចាប់ផ្ដើមការប្រកួតយឺតរហូតដល់ទៅ ៨លើកក្នុងនោះគឺត្រូវពិន័យជាប្រាក់ប្រមាណ៣៩ម៉ឺនផោន។ ចំណែកក្នុងរដូវកាល២០២៣-២០២៤ គេបានរកឃើញថា Manchester City បានពន្យារការប្រកួតចំនួន ១៤ ដងដោយត្រូវពិន័យជាប្រាក់សរុបមានចំនួន១,៧លានផោនផងដែរ៕
