វៀតណាម ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ដោយសារការពន្យារពេលផ្តល់សំណងដល់កីឡាករបារាំង Mamadou Guirassy ក្លឹបបាល់ទាត់មួយ របស់ប្រទេសវៀតណាម Khanh Hoa FC ត្រូវបាន FIFA ហាមប្រាមក្នុងការចុះឈ្មោះកីឡាករថ្មី សម្រាប់ទីផ្សារដោះដូរកីឡាករចំនួន ៣ រូប ។
ការហាមប្រាមនេះនឹងមានប្រសិទ្ធភាពក្នុងកំឡុងរដូវក្តៅ និងរដូវរងាឆ្នាំ ២០២៤ និងទីផ្សារដោះដូរកីឡាកររដូវក្តៅឆ្នាំ ២០២៥ ដោយហាមឃាត់ក្លឹប Khanh Hoa សម្រាប់ការចុះ ឈ្មោះកីឡាករថ្មី រួមទាំងការចុះហត្ថលេខា ឬខ្ចីកីឡាករពីក្លឹបផ្សេងទៀត។ ទោះជាយ៉ាងណាក៏ដោយ ក្លឹប V. League 2 នៅតែត្រូវបានអនុញ្ញាត ឲ្យលក់កីឡាករ ឬផ្សព្វផ្សាយយុវជនពីសាលារបស់ពួកគេ។
នៅខែមីនា ឆ្នាំ២០២៤ Khanh Hoa បានបញ្ឈប់កិច្ចសន្យា របស់កីឡាករ Mamadou Guirassy ជាមួយកិច្ចព្រមព្រៀង ដើម្បីផ្តល់សំណង ដល់លោកសម្រាប់ប្រាក់ខែ ៣ ខែគឺខែមីនា មេសា និងឧសភា ។ ទោះជាយ៉ាងណាក៏ដោយ ខណៈគណនីធនាគាររបស់ក្លឹបត្រូវបានបង្កកចាប់ពីថ្ងៃទី ១៥ ខែមីនាដល់ថ្ងៃទី ២៥ ខែមិថុនា ដោយសារមិនបានបង់ពន្ធចាប់ពីរដូវកាល ២០២២ ២៣ ហើយKhanh Hoa មិនអាចបំពេញតាមតម្រូវការរបស់កីឡាករ Guirassy សម្រាប់ការទូទាត់តែម្តង។ ក្រោយមកក្លឹបបានស្នើឲ្យបង់ជា ៣ លើក ប៉ុន្តែខ្សែប្រយុទ្ធសញ្ជាតិបារាំងបានបដិសេធ។
នៅថ្ងៃទី២៧ ខែមីនា FIFA បានចេញលិខិតមួយតម្រូវឲ្យ Khanh Hoa បង់ប្រាក់ឲ្យកីឡាករបារាំងត្រឹមថ្ងៃទី ១៦ ខែមេសា ឆ្នាំ ២០២៤ ។ ចំនួនប្រាក់បៀវត្សរ៍រយៈពេល ៣ ខែគឺ ១៩,៥០០ ដុល្លារ។ ទោះយ៉ាងណាក៏ដោយ វាមិនទាន់ដល់ថ្ងៃទី ២៦ ខែមិថុនា ដែល Khanh Hoa អាចបង់ប្រាក់ Guirassy បន្ទាប់ពីគណនីធនាគាររបស់ពួកគេមិនត្រូវបានបង្កក។
នៅថ្ងៃទី ២ ខែកក្កដា FIFA បានប្រកាសថា ដោយសារតែការទូទាត់យឺតយ៉ាវ ចំនួនទឹកប្រាក់របស់ Khanh Hoa ជំពាក់បានកើនឡើងពី ១៩,៥០០ ទៅ២៧,៩០០ដុល្លារ រួមទាំង ការផាកពិន័យ និងការប្រាក់ ៥ ភាគរយ។ ក្លឹបវៀតណាមបានយល់ព្រមបង់ប្រាក់នៅសេសសល់ និងឈានដល់កិច្ចព្រមព្រៀង ជាមួយ Guirassy ដើម្បីទូទាត់សំណងត្រឹមថ្ងៃទី ៣ ខែសីហា ដើម្បីចៀសវាងការប្តឹង ៕
