កូរ៉េខាងត្បូង ៖ សារព័ត៌មានកូរ៉េខាងត្បូងបានរាយការណ៍ថា អតីតគ្រូបង្វឹកបាល់ទាត់ជម្រើសជាតិ វៀតណាម លោក Park Hang-seo កំពុងជ្រើសរើសក្រុមណាមួយ ជាលើកចុងក្រោយដោយប្រុងប្រយ័ត្ន ក្នុងអាជីពជាគ្រូបង្វឹក មុនពេលលោកប្រកាសជាផ្លូវការ នៃចូលនិវត្តន៍ របស់លោកសម្រាប់វិស័យកីឡាបាល់ទាត់ យោងតាមការចេញផ្សាយពីគេហទំព័រ VN Express ។
លោក Park មិនបានបង្វឹកក្រុមផ្សេងឡើយ ចាប់តាំងពីលោកបានចាកចេញពីក្រុមបាល់ទាត់ជម្រើសជាតិវៀតណាមក្នុងខែមករា ឆ្នាំ២០២៣។ លោកបានផ្តោតអារម្មណ៍ ទៅការងារគ្រូបង្វឹកនៅប្រទេសឥណ្ឌា បណ្តាប្រទេសអាស៊ីអាគ្នេយ៍ ក្លឹបវៀតណាម និងសូម្បីតែជាអ្នកចាត់ការ បណ្ដោះអាសន្នរបស់កូរ៉េខាងត្បូង ។ ទោះជាយ៉ាងណាក៏ដោយ ការងារតែមួយគត់ដែលលោក Park បានចាប់យកមកទល់ពេលនេះ គឺការធ្វើជាទីប្រឹក្សាសម្រាប់ក្រុម Bac Ninh FC ក្នុងផ្នែកទី២នៃបាល់ទាត់វៀតណាម។
ប្រភពមួយបានប្រាប់កាសែតកូរ៉េខាងត្បូង News1 ថា នេះនឹងក្លាយជាការឈប់សម្រាកចុងក្រោយក្នុងអាជីពជាគ្រូបង្វឹករបស់លោក ដោយបន្ថែមថា បន្ថែមពីលើប្រាក់ខែ និងអត្ថប្រយោជន៍ផ្សេងទៀត លោក Park កំពុងព្យាយាមធ្វើជម្រើសដែលមានន័យសម្រាប់រូបលោក។
កាលពីចុងខែមិថុនា លោក Park ត្រូវបានកាសែត Times of India ប្រកាសថា ជាគ្រូបង្វឹកម្នាក់ក្នុងចំណោមគ្រូបង្វឹក ២៩១ នាក់ បានដាក់ពាក្យ សម្រាប់តំណែងគ្រូបង្វឹកក្រុមបាល់ទាត់ជម្រើសជាតិឥណ្ឌា ។ ទោះបីជាយ៉ាងណាក៏ដោយ គ្រូបង្វឹកសញ្ជាតិកូរ៉េខាងត្បូងរូបនេះ បាននិយាយថា លោកមិន ដាក់ពាក្យសុំនោះទេ ទោះបីជាលោកបានចាត់ទុក ប្រទេសឥណ្ឌា ជាគោលដៅដ៏មានសក្តានុពលក៏ដោយ។ នៅទីបញ្ចប់ ឥណ្ឌាបានតែងតាំង គ្រូបង្វឹកសញ្ជាតិអេស្ប៉ាញ Manolo Marquez ។
កាលពីពាក់កណ្តាលខែកក្កដានេះ DJ Management ជាក្រុមហ៊ុនតំណាងឲ្យលោក Park បាននិយាយថា សហព័ន្ធកីឡាបាល់ទាត់កម្ពុជា (FFC) បានទាក់ទងគាត់ឲ្យគ្រប់គ្រងក្រុមបាល់ទាត់ជម្រើសជាតិរបស់ពួកគេ។
DJ Management បានប្រាប់ Yonhap News ថា ក្រៅពីប្រទេសកម្ពុជា យើងទទួលបានការផ្តល់ជូនជាច្រើនដូចជាជាមួយប្រទេសឥណ្ឌា ។ យើងមិនទាន់សម្រេចចិត្តនៅឡើយទេ ហើយយើងកំពុងពិចារណា ៕
