បារាំងបានយកឈ្នះ ទៅលើក្រុមបែលហ្សិក ២-០ ក្នុងការប្រកួត Nations League សម្រាប់សប្ដាហ៍ទី២របស់ខ្លួន ខណៈ Kylian Mbappe អង្គុយកៅអីម្រុង ។
កាលពីប្រកួតទី១ក្នុងពូល A2 បារាំងបានខកចិត្តម្ដងហើយ ដោយចាញ់ក្រុមអ៊ីតាលី ៣-១ក្នុងដីខ្លួនឯង ហើយប្រកួតនោះគេឃើញដាក់ Kylian Mbappe ឲ្យលេងពេញ៩០នាទី ប៉ុន្តែប្រកួតនេះDidier Deschamps សម្រេចចិត្តដាក់ K. Mbappe ឲ្យអង្គុយកៅអីបម្រុងរហូតដល់នាទីទី៦៧ ហើយយកឈ្នះ បែលហ្សិក ២-០ ត្រឡប់មកវិញ ។
២គ្រាប់របស់បារាំងគឺរកបានដោយ R. Kolo Muani នាទីទី២៩ និងមួយគ្រាប់ទៀត រកបានដោយ O. Dembele នាទីទី៥៧ ។ ពីរគ្រាប់នេះគ្រប់គ្រាន់ឲ្យបារាំង បាន៣ពិន្ទុត្រឡប់មកវិញសងជំងឺចិត្ត ដែលពួកគេខកចិត្តក្រោយចាញ់អីតាលីយ៉ាងអាម៉ាស់ក្នុងដីរបស់ខ្លួនឯងកាលប្រកួតមុន ហើយជួយឲ្យគេឡើង មកកាន់លេខ២ក្នុងពូល A2 នេះ ខណៈអ៊ីតាលីបន្តឈ្នះ២-១ទៅលើ អ៊ីស្រាអែល ដើម្បីមាន៦ពិន្ទុ ពេញឈរនៅកំពូលតារាង ៕
