ភ្នំពេញ៖លោក កឹម សុខុន អនុប្រធានតំណាងលោក ប៉ាន សូរស័ក្កិ ប្រធាន សហព័ន្ធកីឡាទោចក្រយានកម្ពុជានារសៀលថ្ងៃទី១៦ ខែកញ្ញា ឆ្នាំ២០២៤ បានរៀបចំមហាសន្និបាត បញ្ចប់អាណត្តិទី៤ និងបន្តអាណត្តិទី៥ ឆ្នាំ ២០២៤-២០២៨ នៅទីស្នាក់ការគណៈកម្មការជាតិអូឡាំពិកកម្ពុជា ។
ក្នុងឱកសមហាសន្និបាតខាងលើនេះក៏ដោយមានការអញ្ជើញចូលរួមសំណាក់លោក តែម ម៉ឺន អគ្គលេខាធិការរងគណៈកម្មការជាតិអូឡាំពិកកម្ពុជា និងលោក អ៊ុក ឌីម៉ង់ អគ្គនាយករងនៃអគ្គនាយកដ្ឋានកីឡាតំណាងឲ្យលោក ប៉ុន សុខ អគ្គនាយកកីឡានៃក្រសួងអប់រំ យុវជន និងកីឡា ព្រមទាំងអ្នកតំណាងក្លិបជិះកង់ទំាងអស់។
លោក កឹម សុខុន បានមានប្រសាសន៍ថា លោកសូមវាយតម្លៃខ្ពស់ចំពោះសមាជិកប្រតិបត្តិអាណត្តិចាស់ដែលបានខិតខំប្រឹងប្រែងបំពេញតួនាទីរបស់ខ្លួន បានយ៉ាងល្អ ដើម្បីរួមគ្នាជួយជម្រុញអោយសហព័ន្ធ ទោចក្រយាន្តកម្ពុជាមានការអភិវឌ្ឍ ។ លោកបានឯកភាពលើទិសដៅផែនការយុទ្ធសាស្ត្រសំខាន់ៗក្នុងអាណត្តិថ្មីរួមជាមួយការអនុម័តលើរបាយការណ៍ហិរញ្ញវត្ថុ ការធ្វើវិសោធនកម្ម លក្ខន្តិកៈ និងបទបញ្ជាផ្ធៃក្នុង របស់សហព័ន្ធសម្រាប់អាណាត្តិទី៥ ឆ្នាំ២០២៤-២០២៨ ។
លោកអនុប្រធាន បានអនុម័ត និងផ្តល់សេចក្តីទុកចិត្តលើសមាសភាពគណកម្មាធិការប្រតិបត្តិថ្មី ដោយផ្អែកតាមលទ្ធផលខាងលើ អង្គមហាសន្និបាតសង្ឃឹមជឿជាក់ថា គណៈកម្មាធិការប្រតិបត្តិអាណត្តិថ្មី និងបន្តដឹកនាំសហព័ន្ធមួយនេះ ឆ្ពោះទៅរកការរីកចម្រើនបន្តបានភាពជោគជ័យថ្មីៗបន្ថែមទៀត ។
សម្រាប់សមាភាពគណៈកម្មាធិការប្រតិបត្តិថ្មីរបស់សហព័ន្ធកីឡាទោចក្រយានកម្ពុជា ក្នុង អាណត្តិទី៤ (ឆ្នាំ២០២៤-២០២៨) រួមមានលោក ប៉ាន សូរស័ក្កិ ប្រធានសហព័ន្ធ លោក កឹម សុខុន លោក វង្ស ខាន់ពៅ ឡាយ សុខសៅគន្ធា អនុប្រធាន លោក នូ ចំរើន អគ្គលេខាធិការ លោក ព្យែរ អ៊ីវកាទ្រី លោក សុខ ដារិទ្ធិ អគ្គលេខាធិការរង កញ្ញា សួង ចាន់តូរ៉ាទី អគ្គហេរញ្ញិក រួមជាមួយសមាជិក៥រូប មាន លោក ឡុង កែមវិចិត្រ លោក អ៊ូច សាវិន កញ្ញា មាស តឿ លោក សែម ប៊ុតឌី និងលោក ខ្លួត ករណី។
លោក នូ ចម្រើន អគ្គលេខាធិការសហព័ន្ធកីឡាទោចក្រយាន្តកម្ពុជា បានសរុបរបាយការណ៍ ស្តីពីលទ្ធផលការងារ ដែលសហព័ន្ធសម្រេចបាន និងការវិវឌ្ឍរបស់សហព័ន្ធពីមួយដំណាកាល ទៅមួយដំណាក់កាល នាពេលកន្លងមក ដែលបានដាក់ចេញនូវផែនការយុទ្ធសាស្ត្រ ច្បាស់លាស់ ក្រោមការដឹកនាំរបស់ឯកឧត្តម ប៉ាន សូរស័ក្កិ ក្នុងអាណត្តិចាស់៕
