មានការប្រជុំពិសេសមួយរវាងលោក Sir Jim Ratcliffe ម្ចាស់ភាគហ៊ុនមួយក្នុងក្លឹបបិសាចក្រហម និងអតីតអ្នកចាត់ការ Real Madrid លោក Zinedine Zidane ពីគោលបំណងចង់បានលោក មកកាន់ការងារនៅ Manchester United ។
លោក Sir Jim Ratcliffe បាននិយាយថា លោកធានាថានឹងយក Zidan មកដឹកនាំបិសាចក្រហម ក៏ព្រោះតែលោកចង់បង្កើតក្លឹបដ៏ខ្លាំងមួយនេះឡើងវិញ។ យ៉ាងណាគោលដៅដែលលោកដាក់នោះមិនមែនរយៈពេលខ្លីនោះទេ ព្រោះតែលោកយល់ថាបើចង់សាងបិសាចក្រហមឡើងវិញត្រូវការពេលវេលាយូរដែរ។
ជាមួយនឹងការមកកាន់បិសាចក្រហម Zidane ក៏ចង់បានការធានាពីក្លឹបគឺទាក់ទងនឹងទំនុកចិត្ត ព្រោះតែលោកចង់បានការជឿជាក់មកកាន់លោកថា បើលទ្ធផលបែបណាក្លឹបត្រូវតែផ្ដល់ឱកាសឲ្យលោកបានដឹកនាំបន្តក្នុងរយៈពេលគួរសមណាមួយ។ ជាងនេះទៅទៀត Zidane ក៏ចង់បានសិទ្ធក្នុងការសម្រេចចិត្តទិញឬលក់កីឡាករក្នុងក្លឹបផងដែរ។
បុរសសញ្ជាតិបារាំងបានលាលែងពីការងារនាមជាអ្នកចាត់ការតាំងពីលោកចែកផ្លូវជាមួយ Real Madrid កាលឆ្នាំ២០២១មកម្ល៉េះ ហើយមកដល់ពេលនេះលោកមិនទាន់ចូលកាន់តំណែងនៅក្លឹបណាមួយឡើយ។
យ៉ាងណាបិសាចក្រហមក៏មិនទាន់បញ្ចប់តំណែងលោក Erik Ten Hag នោះដែរ ដោយសារតែក្លឹបចង់ផ្ដល់ឱកាសឲ្យលោកសាកដឹកនាំមួយរយៈពេលខ្លីទៀត ក៏ជាពេលដែលបិសាចក្រហមកំពុងតែសំឡឹងរកអ្នកចាត់ថ្មីណាម្នាក់ដ៏សក្ដិសមមកកាន់តំណែងនេះ៕
