អ្នកចាត់ការរបស់ក្រោមតោខៀវ Chelsea លោក Enzo Maresca បាននិយាយថា លោកមិនដែលឮក្លឹបចង់បានការបញ្ចប់ English Premier League នៅ Top 4 អីទេ។
អ្នកចាត់ការសញ្ជាតិអ៊ីតាលីបានបញ្ជាក់ថា គោលដៅរបស់ក្លឹបមិនមែនសំដៅចង់បាន Top 4 ដើម្បីទទួលបានតែកៅអីលេងនៅ UEFA Champions League អ្វីនោះទេ។ ការមកដឹកនាំរបស់លោក និងក្លឹបគឺបានដាក់គោលដៅ៤ឬ៥ឆ្នាំ ដើម្បីអភិវឌ្ឍន៍ក្រុមឲ្យឆ្ពោះទៅរកភាពជោគជ័យ និងក្លាយជាក្រុមខ្លាំងបំផុតមួយ។
លោកបន្ថែមថា គ្រប់គ្នាធ្វើការរាល់ថ្ងៃដើម្បីគោលដៅសំខាន់ជាងនេះ និងមានទិសដៅពិតប្រាកដ។ គ្រប់យ៉ាងគឺប្រឹងប្រែងអស់ពីចិត្តទាំងអស់គ្នា ដើម្បីគោលដៅច្បាស់ដែលសំខាន់ៗ មិនសំដៅលើការចង់បាន Top 4 ក្នុងតារាង EPL នោះឡើយ។
សូមបញ្ជាក់ថា បច្ចុប្បន្ននេះ Chelsea កំពុងស្ថិតនៅលេខរៀងទី៥ ក្នុងតារាង English Premier League គិតត្រឹមសប្ដាហ៍ទី៩ ដោយមាន១៧ពិន្ទុ ខណៈក្រុមលេខ៤ Aston Villa មាន១៨ពិន្ទុលើស Chelsea ១ពិន្ទុប៉ុណ្ណោះ។ បើមើលទៅលើការដឹកនារបស់លោក Enzo Maresca ៩ប្រកួតមកនេះគឺស្ថិតក្នុងកម្រិតល្អបង្គួរ ៩ប្រកួតឈ្នះ៥ ស្មើ២ និងចាញ់២ ប្រកួត៕
