ភ្នំពេញ ៖ សហព័ន្ធខ្មែរ កីឡាហែលទឹក នឹងបញ្ជូនប្រតិភូដឹកនាំ មន្ត្រីបច្ចេកទេសអន្តរជាតិ គ្រូបង្វឹក គ្រូជំនួយ និងកីឡាករ -កីឡាការិនី ហែលទឹកទៅចូលរួមព្រឹត្តិការណ៍ ប្រកួតកីឡាហែលទឹកជ្រើសរើស ជើងឯកយុវជនអាស៊ីអាគ្នេយ៍ លើកទី៤៦ ឆ្នាំ២០២៤ (46th SEA Aquatics Swimming Age Group Championships 2024) ចាប់ពីថ្ងៃទី៤ ដល់ថ្ងៃទី៩ ខែធ្នូ ឆ្នាំ២០២៤ នៅទីក្រុងបាងកក ប្រទេសថៃ ។
លោក ហែម គីរី អគ្គលេខាធិការ នៃសហព័ន្ធខ្មែរ កីឡាហែលទឹក បានប្រាប់តាមអនឡាញឲ្យដឹងថា សហព័ន្ធត្រៀម បញ្ជូនប្រតិភូដឹកនាំ មន្ត្រីបច្ចេកទេសអន្តរជាតិ គ្រូបង្វឹក គ្រូជំនួយ និងកីឡាករ-កីឡាការិនី ១៧នាក់ចូលរួម ប្រកួតកីឡា ហែលទឹក ជ្រើសរើសជើងឯក យុវជនអាស៊ីអាគ្នេយ៍ លើកទី៤៦ ឆ្នាំ២០២៤ នៅប្រទេសថៃខាងមុខនេះ ។ ការបញ្ជូនក្រុមអត្តពលិក ហែលទឹកកម្ពុជា គឺជាការត្រៀមខ្លួនមួយ របស់សហព័ន្ធដោយផ្តោត ទៅក្រុមកីឡាករ -កីឡាការីនីយុវជន សម្រាប់ព្រឹត្តិការណ៍ការប្រកួតយុវជនអាស៊ី ឆ្នាំ២០២៩ ដែលប្រទេសកម្ពុជាធ្វើម្ចាស់ផ្ទះការប្រកួត ។
លោកអគ្គលេខាធិការ បានបន្តថា ការចេញទៅប្រកួតលើកនេះ សហព័ន្ធបែង ចែកចេញជា ៣ ប្រភេទអាយុរួមមាន ចាប់ពីអាយុ ១៣ ឆ្នាំដល់ ១៤ ឆ្នាំ អាយុ ១៥ ឆ្នាំដល់ ១៦ ឆ្នាំ និងអាយុ ១៧ ឆ្នាំឡើង ។ ចំណែកក្រុមកីឡាករ -កីឡាការីនីកម្ពុជា បានបញ្ជូន ទៅចូលរួមគ្រប់អាយុ ទំាងអស់តែម្តង ។ ក្រុមអត្តពលិកហែលទឹកកម្ពុជា ទំាងអស់សុទ្ធសឹងមាន បទពិសោធន៍ក្នុងការ ប្រកួតកម្រិតយុវជននេះផងដែរ ។
លោក ហែម គីរី បានបញ្ជាក់ថា សម្រាប់ ការប្រកួតខាងលើកនេះ លោកបានសំឡឹងទៅលើវិញ្ញាសាមួយ ចំនួនដែលឈានជើងចូល ក្នុងការដណ្តើមមេដាយ ជូនប្រទេសជាតិយើង ហើយការចូលរួមការប្រកួត ក៏ជាការវាស់ស្ទង់សមត្ថភាព កីឡាករ-កីឡាការីនីវ័យក្មេង និងផ្តល់ឱកាសឲ្យពួកគេ បានចូលរួមការប្រកួត កម្រិតអន្តរជាតិឲ្យបានច្រើន និងជាលើកទី១ ដែលសហព័ន្ធខ្មែរកីឡាហែលទឹក បានបញ្ជូនលក្ខណៈទ្រង់ទាយធំរហូតដល់ ១៧ នាក់។
បញ្ជាក់ថា សហព័ន្ធខ្មែរកីឡាហែលទឹក ប្រតិភូដឹកនាំ មន្ត្រីបច្ចេកទេសអន្តរជាតិ គ្រូបង្វឹក គ្រូជំនួយ និងកីឡាករ-កីឡាការិនី ១៧នាក់ ដូចជាលោក ហែម គីរី ប្រធានប្រតិភូដឹកនាំ លោក នាង សូរិទ្ធិយ៉ា ជាមន្ត្រីបច្ចេកទេសអន្តរជាតិ លោក ហែម ថុនពន្លឺ គ្រូបង្វឹក លោក ចេង ពិរោទ គ្រូជំនួយ លោក ចេង សុផា គ្រូជំនួយ និងលោក ខឿន រ៉ាត់ធីទុន គ្រូជំនួយ ។
កីឡាការិនី ឡាផ្លាណេតា កាឡាទេពី កីឡាការិនី អ៊ីសូប៊ែរ អេរីកា កីឡាការិនី ឃីន ចន្ទចរិយា កីឡាករ វ៉ាន់អូស្តិន ពិទ័រសុខខា កីឡាករ លឹម សុខវិរៈស័ក្តិ កីឡាករ ទូ ថាវរៈ កីឡាករ សុខ ឥស្សរៈ កីឡាករ ជា ពិសិដ្ឋរិទ្ធិស័ក កីឡាករ ហែម ថុនពុទ្ធាវង្ស កីឡាករ ទូ ឋានៈ និងកីឡាករ ហែម ថុនរ៉ូណូ ៕
