វៀតណាម ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ក្រុមដែលលើកពានរង្វាន់ AFF Cup 2024 នឹងទទួលបាន ៣០០,០០០ដុល្លារ អាមេរិក ពីសហព័ន្ធកីឡាបាល់ទាត់អាស៊ាន (AFF) ប៉ុន្តែក្រុមបាល់ទាត់ជម្រើសជាតិ វៀតណាម អាចទទួលបានប្រាក់រង្វាន់បន្ថែមពីសហព័ន្ធ និងអ្នកឧបត្ថម្ភថែមទៀត ។
ការប្រកួតដែលនឹងចាប់ផ្តើមនៅថ្ងៃទី ៩ ខែធ្នូ និងបញ្ចប់នៅថ្ងៃទី ៥ ខែមករា ឆ្នាំ ២០២៥ នឹងឃើញក្រុមជើងឯកនាំយកមកផ្ទះវិញ ដោយមានប្រាក់រង្វាន់ចំនួន ៣០០,០០០ ដុល្លារអាមេរិក ។ ជើងឯករងនឹងទទួល បានចំនួន ១០០,០០០ដុល្លារអាមេរិក ខណៈក្រុមជាប់វគ្គពាក់កណ្តាល ផ្តាច់ព្រ័ត្រទាំង ២ នឹងទទួលបាន ៥០,០០០ដុល្លារអាមេរិក។
ប្រាក់រង្វាន់ ៣០០,០០០ដុល្លារ សម្រាប់ជើងឯកបានធ្វើឡើងតាំងពីឆ្នាំ ២០១៨ មក វៀតណាមគឺជាក្រុមដំបូងដែលទទួលបានប្រាក់រង្វាន់នេះ ដោយទទួលបានពានរង្វាន់ក្រោមការបង្វឹក Park Hang-seo ក្នុងឆ្នាំនោះ។ ថៃបានឈ្នះការប្រកួត ២ លើកចុងក្រោយ មុនឆ្នាំ ២០១៨ ម្ចាស់ជើងឯកត្រូវបានផ្តល់រង្វាន់ ២០០,០០០ដុល្លារអាមេរិកពីឆ្នាំ ២០១២ ដល់ ២០១៦។
បន្ថែមពីលើប្រាក់រង្វាន់ AFF Cup ក្រុមជម្រើសជាតិវៀតណាមអាចទទួលបានប្រាក់រង្វាន់ពីសហព័ន្ធបាល់ទាត់វៀតណាម (VFF) និងអ្នកឧបត្ថម្ភ។ ក្នុងពានរង្វាន់ AFF Cup 2018 VFF បានផ្តល់រង្វាន់ដល់គ្រូបង្វឹក Park Hang-seo និងក្រុមជាង ១០០,០០០ ដុល្លារអាមេរិក សម្រាប់ការឆ្លងផុត វគ្គចែកពូល រួមជាមួយនឹងទឹកប្រាក់រាប់សិបពាន់ លានដុងពីអ្នកឧបត្ថម្ភបន្ទាប់ពីការឈ្នះពានរង្វាន់របស់ពួកគេ ។
ពានរង្វាន់ AFF Cup នឹងប្តូរឈ្មោះទៅជា ASEAN Cup ចាប់ពីឆ្នាំនេះតទៅ។ ក្រុមដែលចូលរួមទាំង១០នឹង ត្រូវបែងចែកជា២ពូល ដោយលេងក្នុងផ្ទះ២ប្រកួត និងក្រៅដី២ប្រកួត។ ក្រុមកំពូលទាំងពីរពីពូលនីមួយៗ រួមជាមួយក្រុមចំណាត់ថ្នាក់លេខបីល្អបំផុត ពីរក្រុមនឹងឈានទៅវគ្គពាក់កណ្តាលផ្តាច់ព្រ័ត្រ ។ ចាប់ពីដំណាក់កាលនេះ ការប្រកួតនឹងត្រូវលេងលើពីរជើង ប៉ុន្តែច្បាប់រកគ្រាប់បាល់ក្រៅដី នឹងមិនត្រូវបានអនុវត្តទេ ។
វៀតណាមស្ថិតក្នុងពូល B ជាមួយឥណ្ឌូនេស៊ី ឡាវ ហ្វីលីពីន និងមីយ៉ាន់ម៉ា។ តាមកាលវិភាគ ក្រុមនឹងប៉ះឡាវនៅថ្ងៃទី៩ ខែធ្នូ ឥណ្ឌូណេស៊ី នៅថ្ងៃទី១៥ ខែធ្នូ ហ្វីលីពីន នៅថ្ងៃទី១៨ ខែធ្នូ និងមីយ៉ាន់ម៉ា នៅថ្ងៃទី២១ ខែធ្នូ៕
